काठमाडौं । नेपाल शारीरिक सुगठन तथा फिटनेस् महासंघको आयोजनामा हुने ५५औँ एशियाली शारीरिक सुगठन तथा फिजिक्स स्पोर्टस् प्रतियोगिता भाद्र १५ गतेबाट काठमाडौंमा हुने भएको छ । नेपालमा पहिलो पटक अहिलेसम्मकै ठुलो रहेको प्रतियोगितामा एशियाली राष्ट्रका २५ मुलुकले प्रतिस्पर्धामा सहभागिता जनाउने हिजो(बुधबार) आयोजित पत्रकार सम्मेलनमा जानकारी गराइयो ।
करिब तीन सय खेलाडीहरुले पुरुषतर्फ २८, महिलातर्फ १६ र मिक्स १ गरि ४५ विधामा प्रतिस्पर्धा गर्ने आयोजकले जनाएका छन् । सात दिनसम्म संचालन हुने प्रतियोगिताको पहिलो दिन १५ गते प्रतिस्पर्धी सबै देशका खेलाडी तथा अफिसियलहरु काठमाडौं आईपुग्ने र दर्ता कार्य हुने छ । दोश्रो दिन १६ गते मेनेजर्स मिटिङ्ग, निर्णायक मिटिङ्ग, डोपिङ्ग सेमिनार तथा एशियाली कंग्रेसको आयोजना हुने छ । तेश्रो दिन १७ गते खेलाडीहरुको तौल तथा हाईट मेजरमेन्ट र उमेर समूहको जाँच गर्ने कार्य हुनेछ ।
चौथो दिन १८ गते प्रतियोगिताको उद्घाटनका साथै १६ वटा विधामा प्रतिस्पर्धा हुने छ । जसमा पहिलो दिन नेपाली १४ खेलाडीहरुले ८ वटा समूहमा प्रतिस्पर्धा गर्नेछन् । यस्तै १९ गते २० वटा विधामा प्रतिस्पर्धा हुने र २४ नेपाली खेलाडीहरुले १७ वटा समूहमा प्रतिस्पर्धा गर्नेछन् । २० गते ९ वटा विधामा प्रतिस्पर्धा हुने र ५ जना नेपाली खेलाडीहरुले ४ वटा समूहमा प्रतिस्पर्धा गर्नेछन् ।
प्रत्येक दिनको खेलपश्चात नतिजा प्रकाशन हुने छ । प्रतियोगिताको अन्तिम दिन शारीरिक सुगठन तर्फको ५५, ६०, ६५, ७०, ७५, ८०, ८५, ९०, १०० र ११० केजी गरि १० समूहका प्रथम स्थान प्राप्त गर्ने खेलाडीबीच प्रतिस्पर्धा गराई सर्वोत्कृष्ट हुने खेलाडीलाई मि.एशिया २०२३ घोषित गरिने छ । सम्पूर्ण प्रतिस्पर्धाबाट मेडलका आधारमा शिर्ष तीन स्थान प्राप्त गर्ने ३ देशलाई च्याम्पियनसिपको प्रथम, द्वितीय र तृतीय घोषित गरिने छ ।
मनकामना केवलकारको प्रमुख प्रायोजनमा हुने प्रतियोगितामा राष्ट्रिय खेलकुद परिषद्, नेपाल टुरिजम बोर्ड, एभरेष्ट बैंक, नेपाल ईन्भेष्टमेन्ट मेघा बैंक, महालक्ष्मी विकास बैंक, पञ्चकन्या ग्रुप, केटिएम सिटी, सिद्धार्थ प्रिमियम इन्सुरेन्स, सरगमाथा लुम्बिनी इन्सुरेन्स, शिखर इन्सुरेन्स, सिएफएस रेमिट आदिको विशेष सहयोग रहने आयोजकले जनाएका छन् ।
प्रतियोगिताको आधिकारिक होटलमा याक एण्ड यती र र्याडिसन होटल रहेका छन् । प्रतियोगिताको इभेन्ट म्यानेजमेन्टमा फुनोलोजिक सोलुसन रहेको छ ।
-1731995984.jpg)
