एचजेएनबीएल : टाईम्सको चौथो जित

विविध खेल

Home
विविध खेल
एचजेएनबीएल : टाईम्सको चौथो जित

एचजेएनबीएल : टाईम्सको चौथो जित

खेलकुद मञ्‍च बिहीबार, चैत ५, २०८२

काठमाडौं । हिमालयन जाभा नेसनल बास्केटबल लिग (एचजेएनबीएल) २०२६ मा टाईम्स इन्टरनेसनल क्लबले चौथो जित हात पारेको छ ।

त्रिपुरेश्वरस्थित दशरथ रंगशालाको कभर्डहलमा धिहीबार चएको खेलमा टाईम्सले प्लेबक्स एरेनालाई ८५–७३ ले पराजित गरेको हो ।
टाईम्सले पाँच खेलमा चौथो जितपछि ९ अंक जोडेको छ । शीर्ष स्थानको आर्मी समान अंक जोडेपनि टाईम्स अंक अन्तरका कारण दोस्रोमा छ । बुधबार राती सम्पन्न खेलमा आर्मीले रोएललाई १०३–७५ ले पराजित गरेको छ ।

लिगमा आर्मीले पाँच खेल खेल्दा यो चौथो जित हो । ९ अंक जोडेको आर्मी स्पष्ट अग्रतासहित शीर्ष स्थानमा छ । रोएलको यो चौथो हार हो । रोएलले ५ खेलबाट ६ अंक जोडेको छ ।

नेपाल बास्केटबल संघ (नेबा) को आयोजनामा भईरहेको दोस्रो संस्करणको एचजेएनबीएलमा ८ टिमले प्रतिस्पर्धा गरिरहेका छन् । डबल राउण्ड रोविनका आधारमा हुने लिगमा कूल ५६ खेल हुनेछ । लिग चरणपछि शीर्ष चारमा रहने टोली प्लेअफमा प्रवेश गर्नेछन् ।

प्लेअफ अन्तर्गत लिगमा पहिलो र दोस्रो हुने टोलीबीच पहिलो क्वालिफायर हुनेछ भने लिगमा तेस्रो र चौथो हुने टोलीबीच एलिमिनेटर खेल हुनेछ । पहिलो क्वालिफायरमा पराजित टोली र एलिमिनेटरमा विजयी टोलीबीच दोस्रो क्वालिफायर हुनेछ । पहिलो र दोस्रो क्वालिफायरको विजेताबीच फाइनल खेल हुनेछ ।

प्रतियोगिताको विजेताले नगद ४ लाख प्राप्त गर्नेछन् भने उपविजेताले २ लाख र तेस्रो हुनेले १ लाख हात पार्नेछन् । यस्तै प्रतियोगिताभर उत्कृष्ट प्रदर्शन गर्दै मोस्ट भ्यालुएबल प्लेअर (एमभिपी) घोषित हुनेलाई पनि आकर्षक पुरस्कार प्राप्त गर्ने नेबाले जनाएको छ ।

प्रकाशित मिति: बिहीबार, चैत ५, २०८२ २०:४९