गेटवेलाई फेका कप छात्र फुटबलको उपाधि

फुटबल

Home
फुटबल
गेटवेलाई फेका कप छात्र फुटबलको उपाधि

गेटवेलाई फेका कप छात्र फुटबलको उपाधि

खेलकुद मञ्‍च सोमबार, पुस ८, २०८१

काठमाडौं । डिफेन्डिङ च्याम्पियन गेटवे एकेडेमीले १७औँ फेका कप अन्तरविद्यालय छात्र फुटबल प्रतियोगिताको उपाधि रक्षा गरेको छ । मूलपानी मैदानमा भएको फाइनलमा गेटवेले ब्रम्हकुञ्जलाई २–१ गोलअन्तरले पराजित गर्यो ।

हाइली क्रिएटिभ तेश्रो भयो । हाइली क्रिएटिभले ओरियन्टललाई ५–१ गोलले सहजै हरायो । शीर्ष चार स्थानमा रहने टिमले क्रमशः ३० हजार, २० हजार, १० हजार र ५ हजार नगद पुरस्कार हात पारे । फेकाद्वारा आयोजित प्रतियोगितामा ओरियन्टलका मनोज राम उत्कृष्ट खेलाडी घोषित भए ।

डिफेन्समा ब्रम्हकुञ्जका एलेक्स कुँवर, गोलरक्षकमा ब्रम्हकुञ्जका सन्दिप राई, मिडफिल्डमा गेटवेका प्रतीक रायमाझी र प्रशिक्षकमा गेटवेका सुजन नापित उत्कृष्ट चुनिए । ओरियन्टलका रोशन पक्वाल उदीयमान खेलाडी बने भने प्रतियोगिताभर ६ गोल गरेका गेटवेका प्रदिप खत्री सर्वाधिक गोलकर्ताको सूचीमा शीर्ष स्थानमा रहे । कौस्तुभ एकेडेमीले अनुशासित टिमको उपाधि हात पार्यो ।

विजेतालाई कागेशवरी मनोहरा नगरपालिकाका मेयर उपेन्द्र कार्की, फेकाका अध्यक्ष श्रीराम दाहाललगायतले एक कार्यक्रमबीच पुरस्कृत गरे । मंसिर २८ गतेदेखि सुरु प्रतियोगितामा २५ टिमले नकआउट आधारमा प्रतिस्पर्धा गरेको फेकाका सह-सचिव एवं प्रतियोगिता संयोजक राजु दाहालले जनाएका छन् ।

प्रकाशित मिति: सोमबार, पुस ८, २०८१ १०:२२