रोनाल्डो राष्ट्रिय टोलीमा अटाएनन्

IPL

Home
IPL
रोनाल्डो राष्ट्रिय टोलीमा अटाएनन्

रोनाल्डो राष्ट्रिय टोलीमा अटाएनन्

काठमाडाैं, २० असोज – अक्टोबरमा हुने दुई अन्तर्राष्ट्रिय खेलहरुका लागि पोर्चुगलका स्टार खेलाडी क्रिस्टियानो रोनाल्डो टोलीमा पर्न सकेनन्। सेप्टेम्बरमा सम्पन्न मैत्रीपूर्ण खेलमा नखेलेका रोनाल्डो यसपटक पनि टोलीमा नपर्नुमा धेरैले जिज्ञासा राखेका छन्।

अघिल्लो साता मात्र एक अमेरिकी युवतीले सन् २००९ को घटनालाई लिएर उनमाथि बलात्कारको आरोप लगाएकाले धेरैले उनी राष्ट्रिय टोलीबाट नखेल्नुलाई यस घटनासँग जोडेका छन्।

पोर्चुगलको पत्रिका ए बोला का अनुसार रोनाल्डो राष्ट्रिय टोलीमा नपर्नुमा उनको व्यक्तिगत निर्णय रहेको छ। रोनाल्डोले पोर्चुगलका प्रशिक्षक फर्नान्डो सान्तोससँग उनलाई २०१९ को सुरुआतसम्म राष्ट्रिय टोलीबाट विश्राम दिन अनुरोध गरेको ए बोला ले जनाएको छ।

रियल म्याड्रिडबाट युभेन्टस पुगेका रोनाल्डोले नँया क्लबमा पूर्ण रुपमा फिट हुँदै शत प्रतिशत दिनका लागि केही समय पोर्चुगली टोलीबाट टाढिने निर्णय लिएका हुन्। ए बोला का अनुसार ३३ वर्षे रोनाल्डोको यो अस्थायी निर्णय रहेको र सन्यास लिने कुनै मनसाय नरहेको जनाएको छ।

यसकारण सेप्टेम्बरमा क्रोएसियासँगको खेलमा विश्राम पाएका रोनाल्डो पुनः ओक्टोबरमा पोल्याण्ड र स्कटल्याण्डविरुद्ध खेल्ने टोलीमा परेनन्। २०१८ मै पुनः पोल्याण्ड र इटालीसँगको खेलमा पनि रोनाल्डो नखेल्ने ए बोला को दाबी छ। पोर्चुगलबाट १ सय ५४ खेलमा ८५ गोल गरि सकेका रोनाल्डोले विश्वकप यता पोर्चुगलबाट खेलेका छैनन्।

प्रकाशित मिति: शनिबार, असोज २०, २०७५ १२:१०