अन्तर्राष्ट्रिय केम्पोमा नेपालले जित्यो पाँच पदक

अन्तर्राष्ट्रिय

Home
अन्तर्राष्ट्रिय
अन्तर्राष्ट्रिय केम्पोमा नेपालले जित्यो पाँच पदक

अन्तर्राष्ट्रिय केम्पोमा नेपालले जित्यो पाँच पदक

खेलकुद मञ्‍च आइतबार, भदौ २८, २०८३

काठमाडौं । नेपाली केम्पोले पोर्चुगलमा भएको केम्पो अन्तर्राष्ट्रिय ओपन कपमा उत्कृष्ट प्रदर्शन गर्दै पाँच पदक जितेको छ । पोर्चुगलको अल्बुफेरामा जारी च्याम्पियनसिपमा नेपालले दुई स्वर्ण, दुई रजत र एक कांस्यसहित पाँच पदक जितेको हो ।

केम्पोलाई मार्सल आट्र्सकै हाइब्रिड विधाका रूपमा चिनिन्छ । १४ वर्षे रोशनकुमार यादवले एक्लैले पाँच पदक जित्दै नेपाली केम्पोमा उल्लेखनीय उपलब्धि दिलाएको नेपाल केम्पो खुकुरी फेडेरेसनले जनाएको छ । रोशनले विभिन्न पाँच विधामा प्रतिस्पर्धा गरेका थिए । उनले फुल केम्पो ४० केजी र सबमिसन केम्पो ४० केजी विधामा स्वर्ण पदक जिते । एम्प्टी ह्यान्ड काटा र सेमी केम्पोमा भने रोशन रजत पदकमा नै सीमित भए । उनले लाइट केम्पोमा कांस्य पदक जितेको नेपाल केम्पो खुकुरी फेडेरेसनका अध्यक्ष पाभेल शाहले जानकारी दिए ।

एउटै अन्तर्राष्ट्रिय प्रतियोगितामा १४ वर्षे रोशनले पाँच पदक जित्नु नेपाली केम्पोका लागि महत्वपूर्ण उपलब्धि रहेको फेडेरेसनले जनाएको छ । पोर्चुगिज केम्पो तथा इन्टरनेसनल केम्पो फेडेरेसन (आइकेएफ) ले आयोजना गरेको प्रतियोगितामा उनको प्रदर्शनले अन्तर्राष्ट्रियस्तरमा नेपाली खेलाडीको क्षमता र नयाँ पुस्ताको सम्भावनासमेत देखाएको फेडेरेसनको विश्वास छ ।

नेपाल केम्पो खुकुरी फेडेरेसनका अध्यक्ष पाभेल शाहले पोर्चुगलमा प्राप्त सफलतालाई नेपाली केम्पोका लागि ठूलो उपलब्धि र ऐतिहासिक रहेको बताए । ‘यो हाम्रो लागि अत्यन्तै गर्वको क्षण हो । एउटै खेलाडीले दुई स्वर्णसहित पाँच पदक जित्नु सामान्य होइन । यसले नेपाली केम्पोको क्षमता अन्तर्राष्ट्रिय स्तरमा बलियो हुँदै गएको देखाउँछ,’ अध्यक्ष शाहले भने ।

गत अप्रिलमा सम्पन्न केम्पो विश्व च्याम्पियनसिपमा नेपालले विभिन्न विधामा २५ पदक जितेको फेडेरेसनले जनाएको छ । केम्पोमा विभिन्न सात विधामा हरेक खेलाडीले प्रतिस्पर्धा गर्ने गरेका छन् ।

प्रकाशित मिति: आइतबार, भदौ २८, २०८३ १८:२७