काठमाडौं । आइसीसी पुरुष टी-२० विश्वकप क्रिकेट प्रतियोगिता अन्तर्गत आफ्नो अन्तिम खेलमा नेपालले स्कटल्यान्डविरुद्ध जित हासिल गरेको छ । मंगलबार सम्पन्न खेलमा नेपालले स्कटल्यान्डलाई ७ विकेटले पराजित गरेको हो ।
स्कटल्यान्डले जितका लागि दिएको १ सय ७१ रनको प्रतिस्पर्धात्मक लक्ष्य पछ्याएको नेपालले १९.२ ओभरमा ३ विकेटको क्षतिमा पूरा गर्यो। नेपालको जितमा दीपेन्द्रसिंह ऐरीले २३ बलमा ४ चौका र ३ छक्कासहित अविजित ५० रनको अर्धशतकीय इनिङ खेले ।
नेपालको लागि दीपेन्द्रको यो दोस्रो अर्धशतक हो । वेस्ट इण्डिजविरुद्धको अघिल्लो खेलमा दीपेन्द्रले पहिलो अर्धशतक पूरा गरेका थिए । गुलसन झाले १७ बलमा १ चौका र २ छक्कासहित नटआउट २४ रन बनाए । चौथो विकेटका लागि दीपेन्द्र र गुलसनले ७३ रनको विजयी साझेदारी गरे ।
ओपनर कुशल भुर्तेलले ३५ बलमा १ चौका र ४ छक्कासहित ४३ रन जोडे । अर्का ओपनर आसिफ शेखले २७ बलमा २ छक्कासहित ३३ रन बनाउँदै आउट भए । कुशल र आसिफले पहिलो विकेटका लागि ७४ रनको उत्कृष्ट साझेदारी गरेका थिए ।
कप्तान रोहित पौडेल १४ बलमा १ चौकासहित १६ रन बनाउँदै आउट भए । बलिङतर्फ स्कटल्यान्डका लागि मिचेल लिस्कले ३ विकेट लिएका थिए ।
त्यसअघि मुम्बईस्थित वानखेडे मैदानमा टस हारेर ब्याटिङको निम्तो पाएको स्कटल्यान्डले २० ओभरमा ७ विकेट गुमाएर १ सय ७० रन बनाएको थियो । स्कटल्यान्डका लागि माइकल जोन्सले ४५ बलमा ८ चौका र ३ छक्कासहित सर्वाधिक ७१ रन बनाए ।
त्यस्तै, जर्ज मुन्सेले २७ रन र ब्राण्डन म्याकमुलेनले २५ रन जोडेका थिए । पहिलो विकेटका लागि ओपनर माइकल जोन्स र जर्ज मुन्सेले १० ओभरमा ८० रनको साझेदारी गर्दै स्कटल्यान्डलाई उत्कृष्ट साझेदारी गरेका थिए ।
बलिङतर्फ नेपालका लागि सोमपाल कामीले ४ ओभरमा २५ रन खर्चेर सर्वाधिक ३ विकेट लिए । त्यस्तै, नन्दन यादवले २ विकेट तथा कप्तान रोहित पौडेल र कुशल भुर्तेलले समान १/१ विकेट लिएका थिए ।
नेपाली राष्ट्रिय क्रिकेट टोलीले विश्वकपमा १२ वर्षपछि जित दर्ता गरेको हो । नेपालले सन् २०१४ को विश्वकपमा हङकङलाई ८० रन र अफगानिस्तानलाई ९ रनले पराजित गरेको थियो । नेपालले सन् २०२४ को विश्वकपमा कुनै जित निकाल्न सकेको थिएन ।
-1773059883.jpg)
-1772377085.jpg)
-1770731452.JPG)
-1770898199.JPG)
-1771081584.JPG)
-1770820700.jpg)
