काठमाडौं । तेन्जिङ शेर्पाले कास्य पदक जितेर २०औं एसियाली खेलकुदमा नेपालका लागि पहिलो पदक जितेका छन् । कराते खेलको अन्तिम दिन शेर्पाले पदक जितेर नेपाली खेलकुदलाई रक्त सन्चार गरेका हुन् ।
पुरुष ८४ केजीमाथिको तौलसमूहमा तेस्रो स्थाका लागि भएको प्रतिस्पर्धामा शेर्पाले लाओसका खेलाडी सायासान भाथानालाई ९–१ अंकले पराजित गरि पदक हासिल गरेका हुन् । सेमिफाइनलमा तेन्जिङ इरानका महमुद नेमातीसँग ५–० ले पराजित भएका थिए । त्यस पछि उनले कास्य पदकका लागि प्रतिस्पर्धा गरेका थिए ।
विगतको भन्दा उच्च स्तरमा पदक हासिल गर्ने उद्देश्यका साथ मैदानमा उत्रिएका नेपाली खेलाडीहरुले आज सम्मको प्रदर्शनमा उत्साही बनाउन सकेका थिएनन् । तर, तेन्जिङको विजय संगै बाँकी खेलका खेलाडीहरुमा हैशला संगै उत्साह बढेको छ ।
सबै कुनै न कुनै पदकका लागि आशा गरिएकी एरिकाले समेत सफलता पाउन सकिनन् । उनी पनि कांस्य पदकका लागि निकै उत्कृष्ट खेल्दा खेल्दै पनि पराजित भइन् ।
एसियाली खेलकुदमा हालसम्म शेर्पाको सहित २७ पदक प्राप्त भएको छन् । यसमा करातेले खेलाडीहरुले ५ वटा पदक देशका लागि दिए । एरिका गुरुङले १९औं एसियाडमा ऐतिहासिक रजत पदक दिलाएकी थिईन । उनले ६८ केजीमाथिको तौल समूहमा रजत पदक जितेकी थिईन् ।
यस्तै जापान कै हिरोसिमामा सन् १९९४ मा भएको एसियाडमा सीता राईले कास्य पदक जितेकी थिईन भने १९९८ मा बैंककको थाइल्यान्डमा भएको एसियाडमा समरबहादुर गोले र दक्षीण कोरियाको इन्चोनमा सन् २०१४ मा भएको एसियाडमा विमला तामाङले देशका लागि कास्य पदक दिलाएका थिए ।
२०औं एसियाली खेलकुद उद्घाटन भएको चौथो दिनसम्म कुनै पदक नआउदा तेन्जिङको सफलताले खेलाडी, पदाधिकारी र खेलप्रेमीहरुमा आशाको सन्चार भएको छ । अव बाँकी प्रर्दशनहरुमा खेलाडीहरु थप उत्साहका साथ खेल्ने विश्वास गर्न सकिन्छ ।
यता बक्सिङमा अझै आश गर्न सकिने अवश्था छ । आजै भएको बक्सिङको पुरुष ६० केजी तौलसमूहको पहिलो चरणमा खगेन्द्र रोका मगर बिजय भएका छन् । उनले मकाउका जोन रेयेस सलिनास एल्भिनलाई ५–० ले पराजित गरेका छन् । पदकका लागि उनले अझ कम्तिमा पनि दुई चरण पार गर्नु पर्ने हुन्छ ।
यस्तै कबड्डीमा पुरुष टिम प्रतिस्पर्धाबाट बाहिरिए पनि महिला टिम प्रति सबैको विश्वास देखिन्छ । लिग चरणमा पहिलो खेलमा थाइल्यान्डलाई ४६–४३ ले पराजित गरेको छ ।
उसुका खेलाडीहरुले पनि सफलता हात पार्न सकेनन् । यस्तै महिला भलिबल अघिल्लो संस्करण भन्दा र्याङकिङमा कमजोर देखियो । सफ्ट टेनिस, टेबलटेनिस, साईक्लिङ लगातका खेलहरु जारी छन् भने क्रिकेट, तेक्वान्दो, गल्फ, ब्याडमिन्टन, जुडोका खेलहरु सुरु हुँदैछन् । यस्तै एथलेटिक्स लगायतका खेलमा राष्ट्रिय नयाँ रेकर्ड राख्ने अपेक्षा गर्न सकिन्छ ।
-1789698769.jpg)
