एसीसी यु-१९ प्रिमियर कपमा नेपाल उपविजेता

क्रिकेट

Home
क्रिकेट
एसीसी यु-१९ प्रिमियर कपमा नेपाल उपविजेता

एसीसी यु-१९ प्रिमियर कपमा नेपाल उपविजेता

काठमाडौं । एसीसी यु-१९ प्रिमियर कपमा नेपाल संयुक्त अरब इमिरेट्स (यूएई) सँग पराजित हुँदै उपविजेता बनेको छ । सोमबार सम्पन्न फाइनल खेलमा घरेलु टोली युएईसँग २७ रनले पराजित भएसँगै नेपाल उपविजेतामा सीमित भएको हो ।

युएईले जितको लागि दिएको १ सय ४८ रनको लक्ष्य पछ्याएको नेपाल ३३ दशमलव २ ओभरमा १ सय २० रनमा समेटियो । नेपालका लागि कप्तान अशोक धामीले सर्वाधिक ३४ रन, आशिष लुहारले २५ रन, रोसन विश्वकर्माले २५ रन र भन्स क्षेत्रीले ११ रन बनाए ।

नेपालका अन्य ब्याट्सम्यानले दोहोरो अंकमा रन बनाउन सकेनन् । बलिङमा युएईका लागि युग जै शर्मा, अली अस्गर शुम्स र नुरुलाह अयुबले समान २/२ विकेट लिए ।

यसअघि अजमानस्थित करवान मैदानमा टस हारेर पहिला ब्याटिङ गरेको यूएईले ४५ दशमलव ५ ओभरमा सबै विकेट गुमाउँदै १ सय ४७ रन बनाएको थियो । युएईका लागि अहमेद खुदादले सर्वाधिक ७१ रनको अर्धशतकीय इनिङ्स खेल्दा नोरुल्लाह अयोबीले २६ तथा अयान मिसबाहले ११ रन बनाएका थिए ।

बलिङमा नेपालका लागि दयानन्द मन्डलले ६.५ ओभरमा १७ रन खर्चिएर सर्वाधिक ६ विकेट लिए । अपराजित पौडेलले २ विकेट तथा नितेश कुमार पटेल र अशोक धामीले समान १/१ विकेट लिएका थिए ।

नेपाल अपराजित रहँदै प्रतियोगिताको फाइनलमा पुगेको थियो । यसअघि नै फाइनलमा पुग्ने दुवै टोली नेपाल र यूएई एसिया कपका लागि छनोट भइसकेका थिए । यु-१९ एसिया कप आगामी डिसेम्बरमा यूएईमा हुँदैछ ।

प्रकाशित मिति: सोमबार, मंसिर १६, २०८२ १९:३५