काठमाडौं । नेपाल प्रिमियर लिग (एनपीएल) सिजन–२ मा साबिक उपविजेता सुदूरपश्चिम रोयल्सले लगातार तेस्रो जित निकालेको छ । सोमबार सम्पन्न खेलमा सुदूरपश्चिमले कर्णाली याक्सलाई ४५ रनले पराजित गरेको हो ।
सुदूरपश्चिमले दिएको १ सय ४० रनको लक्ष्य पछ्याएको कर्णालीले १९.२ ओभर अलआउट हुँदै ९४ रनमात्र बनाउन सक्यो । जारी एनपीएल सिजन–२ मा कुनैपनि टोलीले बनाएको अहिलेसम्मकै न्यून स्कोर हो ।
कर्णालीका लागि पवन सर्राफले २६ बलमा ४ चौकासहित सर्वाधिक २७ रन बनाए । त्यस्तै मार्क वाटले १७ रन, कप्तान सोमपाल कामीले १४ रन र गुल्शन झाले १३ रन बनाउँदा कर्णालीका अन्य ब्याट्सम्यानले दोहोरो अंकमा रन बनाउन सकेनन् ।
सुदूरपश्चिमका लागि कप्तान दीपेन्द्र सिंह ऐरीले ४ ओभरमा २३ रन खर्चेर सर्वाधिक ४ विकेट लिएका थिए । हर्मित सिंह र अविनाश बोहोराले समान २/२ विकेट लिए । त्यस्तै स्कट कुग्लेन र हेमन्त धामीले समान १/१ विकेट लिएका थिए ।
त्यसअघि, टीयु क्रिकेट मैदानमा टस हारेर पहिला ब्याटिङ गरेको सुदूरपश्चिमले निर्धारित २० ओभरमा ९ विकेट गुमाएर १ सय ३९ रन बनाएको थियो । सुदूरपश्चिमका लागि कप्तान दीपेन्द्र सिंह ऐरीले २८ बलमा १ चौका र २ छक्कासहित सर्वाधिक ३९ रन बनाए ।
आरिफ शेखले २५ बलमा ३ चौकासहित २७ रन बनाए । त्यस्तै हर्मित सिंहले १९ रन, क्रिस लिनले १८ रन, विनोद भण्डारी ११ रन र स्कटले १० रन बनाउँदा सुदूरपश्चिमका अन्य ब्याट्सम्यानले दोहोरो अंकमा रन बनाउन सकेनन् ।
कर्णालीका लागि कप्तान सोमपाल कामीले ४ ओभरमा ३२ रन दिएर सर्वाधिक ३ विकेट लिए । त्यस्तै नन्दन यादवले २ विकेट, मार्क वाट, विपिन शर्मा र युवराज खत्रीले समान १/१ विकेट लिएका थिए ।
जीतसँगै सुदूरपश्चिमले ३ खेलबाट ६ अंक बनाएको छ । पराजित कर्णालीले ३ खेलबाट २ अंक बनाएको छ । भोलि काठमाडौं गोर्खाज र लुम्बिनी लायन्सबीच खेल हुनेछ ।
-1763987403.JPG)
-1763986569.JPG)
-1763979719.jpg)
-1763641213.JPG)
-1761497521.jpg)