मार्क वाटको शतकमा लुम्बिनीमाथि कर्णालीको शानदार जित

क्रिकेट

Home
क्रिकेट
मार्क वाटको शतकमा लुम्बिनीमाथि कर्णालीको शानदार जित

मार्क वाटको शतकमा लुम्बिनीमाथि कर्णालीको शानदार जित

काठमाडौं । नेपाल प्रिमियर लिग (एनपीएल) सिजन–२ मा कर्णाली याक्सले लुम्बिनी लायन्समाथि शानदार जित निकालेको छ । शनिबार सम्पन्न खेलमा कर्णालीले लुम्बिनीलाई ९ विकेटले पराजित गरेको हो ।

लुम्बिनीले दिएको १ सय ५७ रनको लक्ष्य पछ्याएको कर्णालीले १२ ओभर २ बलमा एक विकेट गुमाएर पूरा गर्यो । कर्णालीका लागि ओपनर मार्क वाटले ४४ बलमा ६ चौका र १२ छक्कासहित अविजित १ सय १४ रनको शतकीय पारी खेलेका थिए । उनी एनपीएल-२ मा पहिलो शतक प्रहार गर्ने खेलाडी बनेका छन् ।

प्रियांकन पञ्चाल १२ रनमा आउट हुँदा विल्लियम वोसिष्टो २९ रनमा अविजित रहेका थिए । बलिङमा लुम्बिनीका लागि शेर मल्लले १ विकेट लिए ।

त्यसअघि टीयु क्रिकेट मैदानमा टस हारेर ब्याटिङको निम्तो पाएको लुम्बिनीले निर्धारित २० ओभरमा ८ विकेट गुमाउँदै १ सय ५६ रन बनाएको थियो । लुम्बिनीका लागि कप्तान रोहित पौडेलले ४३ बलमा ४ चौका र २ छक्कासहित सर्वाधिक ४९ रन बनाएका थिए ।

रूबेन ट्रम्पलम्यानले १४ बलमा १ चौका र ३ छक्कासहित अविजित २९ रन बनाए । जोहानीस जोनाथन स्मितले २३ रन तथा डार्सी सर्टले १९ रन बनाउँदा अन्य ब्याट्सम्यानले दोहोरो अंकमा रन बनाउन सकेनन् । शेर मल्ल ७ रनमा अविजित रहेका थिए ।

बलिङमा कर्णलीका लागि नन्दन यादवले सर्वाधिक २ विकेट लिए । गुल्सन झा, मार्क वाट, विपिन खत्री र युवराज खत्रीले समान १/१ विकेट लिएका थिए । आज हुने दोस्रो खेल विराटनगर किंग्स र काठमाडौं गोर्खाजबीच हुनेछ ।

प्रकाशित मिति: शनिबार, मंसिर ७, २०८२ १५:२९