काठमाडौं । नेपाल प्रिमियर लिग (एनपीएल) सिजन–२ मा लुम्बिनी लायन्सले चितवन राइनोजलाई पराजित गरेको छ । बिहीबार सम्पन्न खेलमा लुम्बिनीले चितवनलाई ६ विकेटले पराजित गरेको हो ।
चितवनले दिएको १ सय ४३ रनको लक्ष्य पछ्याएको लुम्बिनीले १८ ओभर ३ बलमा ४ विकेट गुमाएर पूरा गर्यो । लुम्बिनीका लागि गुल्बादिन नइबले २४ बलमा ३ चौका र ३ छक्कासहित सर्वाधिक अविजित ४४ रन बनाएका थिए ।
कप्तान रोहित पौडेल ३९ रन, सन्दीप जोरा २८ रन, डार्सी सर्ट ११ रन, दीलिप नाथ १० रनमा आउट भएका थिए । जेजे स्मित ४ रनमा अविजित रहे । बलिङमा चितवनका लागि रिजन ढकालले २ विकेट तथा सोहेल तन्विरले १ विकेट लिएका थिए ।
त्यसअघि, टीयु क्रिकेट मैदानमा टस हारेर ब्याटिङको निम्तो पाएको चितवनले निर्धारित २० ओभरमा ७ विकेट गुमाउँदै १ सय ४२ रन बनाएको थियो । चितवनका लागि रवि वोपराले ५५ बलमा ४ चौका र ३ छक्कासहित ६६ रनको अर्धसतकीय पारी खेलेका थिए ।
कप्तान कुशल मल्ल २१ रन, सैफ जैब १५ रन, देव खनाल १४ रन, दीपक बोहरा १० रन र सोहिल तन्विर ५ रनमा आउट भएका थिए । अर्जुन साउद ८ रनमा अविजित रहे ।
बलिङमा लुम्बिनीका लागि रुवेन ट्रम्पेल्मेनले सर्वाधिक ३ विकेट लिए । अभिषेश गौतम र गुल्बादिन नइबले समान २/२ विकेट लिएका थिए ।
सिजन–२ को पहिलो खेलमा जित हात पारेको लुम्बिनीको १ खेलबाट २ अंक भएको छ । पराजित चितवनको २ खेलबाट १ जित र १ हार सहित २ अंक रहेको छ । चितवनले पहिलो खेलमा कर्णाली याक्सलाई ४ विकेटले पराजित गरेको थियो ।
-1763641213.JPG)
-1763212170.JPG)
-1761497521.jpg)
