काठमाडौँ । आईसीसी टी-२० विश्वकप एसिया तथा इस्ट एसिया प्यासिफिक छनोटको उपाधि नेपालले जितेको छ । ओमानमा सम्पन्न भएको छनोटको अन्तिम खेलमा सामोआलाई १ सय २४ रनको फराकिलो अन्तरले पराजित गर्दै नेपाल च्याम्पियन बनेको हो ।
अपराजित नेपाल शीर्ष स्थान रहँदै सन् २०२६ मा भारत र श्रीलंकामा हुने टी-२० विश्वकपमा स्थान बनाउँदा ओमन दोस्रो र युएई तेस्रो स्थानमा रहँदै विश्वकपमा पुगेका हुन् । नेपालको यो तेस्रो पटकको विश्वकप यात्रा हो । नेपालले यसअघि सन् २०१४ र सन् २०२४ मा विश्वकप खेलेको थियो ।
ओमान क्रिकेट एकेडेमीको टर्फ-१ मैदानमा शुक्रबार नेपालले दिएको २ सय १२ रनको विशाल लक्ष्य पछ्याएको सामोआले २० ओभरमा ७ विकेटको क्षतिमा ८७ रनमात्रै जोड्यो । सामोआका लागि सिन सोलिआले सर्वाधिक ४० रन जोड्दा बेन्जामिन मैलताले ११ रन बनाए भने अन्य ब्याट्सम्यानले दोहोरो अंकमा रन बनाउन सकेनन् ।
बलिङमा नेपालका लागि ललित राजवंशीले ४ आभेरमा १ मेडनसहित १३ रनमात्र खर्चेर सर्वाधिक ३ विकेट लिए । करण केसी, सन्दीप लामिछाने र कप्तान रोहित पौडेलले समान १/१ विकेट लिएका थिए ।
त्यसअघि, टस हारेर पहिले ब्याटिङ गरेको नेपालले निर्धारित २० ओभरमा नेपालका ओपनर आशिफ शेख र अलराउन्डर दीपेन्द्र सिंह ऐरीको अर्धशतकमा चार विकेट गुमाउँदै २ सय ११ रन बनाएको थियो ।
नेपालका लागि आशिफ शेखले सर्वाधिक ६९ रन बनाए । ३१ बलमा अर्धशतक बनाएका उनले ४१ बलमा ७ चौका र ४ छक्कासहित ६९ रन बनाएका हुन् । टि-२० आई करिअरमा उनको यो सर्वाधिक स्कोर हो ।
यस्तै दीपेन्द्र सिंह ऐरीले पनि अर्धशतक प्रहार गरेका छन् । उनले ३३ बलमा ४ चौका र २ छक्कासहित ५३ रनको योगदान दिए । यस्तै, ओपनर कुशल भुर्तेलले १५ बलमा १७ रन तथा आरिफ शेखले ७ बलमा ९ रन बनाए । कप्तान रोहित पौडेल १२ बलमा २१ रन र लोकेश बम १२ बलमा ४ छक्का र २ चौकासहित ३९ रनमा अविजित रहेका थिए ।
बलिङमा सामोआका लागि डेरियस भिसरले सर्वाधिक २ विकेट लिए । साउमानी टियाई र ड्यानियल बर्गेसले समान १/१ विकेट लिएका थिए । सुपर सिक्समा कुनै पनि खेल जित्न नसकेको सामाओ तालिकाको पुछारमा रहेर विश्वकप छनोटबाट बाहिरियो । यो छनोटमा सामाओसँगै जापान र कतार पनि बाहिरिएका छन् ।
-1760583128.jpg)
