काठमाडौं । राष्ट्रिय समाचार समिति (रासस)को ६४औँ वार्षिकोत्सवका अवसरमा रासस महेन्द्रनगर कार्यालयले आयोजना गरेको मैत्रीपूर्ण क्रिकेट प्रतियोगिताको उपाधि बैङ्कर्स टोलीले हात पारेको छ । बुधबार महेन्द्रनगरस्थित कवर्डहलमा आयोजित फाइनल खेलमा जिल्ला क्रिकेट सङ्घ कञ्चनपुरलाई चार विकेटले पराजित गर्दै बैङ्कर्स टोलीले उपाधि हात पारेको हो ।
बुधबार भएको पहिलो खेलमा बैङ्कर्स टोलीले महाकाली प्रादेशिक अस्पतालको टोलीलाई पराजित गरेर फाइनलमा प्रवेश गरेको थियो भने दोस्रो खेलमा जिल्ला क्रिकेट सङ्घको टोलीले राससको टोलीलाई पराजित गरेर फाइनल प्रवेश गरेको थियो । फाइनल खेलमा टस जितेर ब्याटिङ रोजेको क्रिकेट सङ्घ कञ्चनपुरको टोलीले निर्धारित १० ओभरको खेलमा छ विकेट गुमाएर ८२ रन मात्रै बनाउन सक्यो । सङ्घका लागि निरज चन्दले २९ र नरेन्द्र भट्टले ३५ रन बनाउनबाहेक अन्यले दोहोरो अङ्कमा रन बनाउन सकेनन् । बलिङमा बैङ्कर्स टोलीका हरिश चन्द र प्रदीप तिवारीले समान दुई/दुई विकेट लिए । ८३ रनको लक्ष्य पाएको बैङ्कर्स टोलीले जवाफी ब्याटिङ गर्दै छ विकेटको क्षतिमा नौ ओभरमा लक्ष्य पूरा गर्यो । उसका लागि गौतम मिश्रले २३, ललित कलौनी १५ र हरिश चन्द २३ रन बनाए । बलिङमा क्रिकेट सङ्घका आषिश खत्रीले दुई विकेट लिएभने नरेन्द्र भट्ट, भुपाल विष्ट, खेम भट्ट र निरज चन्दले एक/एक विकेट लिए ।
यसअघि जिल्ला क्रिकेट सङ्घ र राससको टोलीबीच भएको खेलमा क्रिकेट सङ्घले राससको टोलीलाई ३७ रनले पराजित गरेको थियो । टस हारेर ब्याटिङको निम्तो पाएको क्रिकेट सङ्घको टोलीले निर्धारित १० ओभरमा दुई विकेटको क्षतिमा १०२ रन बनायो । क्रिकेट सङ्घका विशाल सोनारले सर्वाधिक ४९ रन बनाए भने भुपाल विष्टले २९ रन बनाउँदा अन्य ब्याट्सम्यानले दोहोरो अङ्कमा रन जोड्न सकेनन् । बलिङमा राससका भुपाल केसी र प्रेम नेपालीले एक/एक विकेट लिए । १०३ रनको चुनौतीपूर्ण लक्ष्य पाएको राससको टोलीले निर्धारित १० ओभरको खेलमा पाँच विकेट गुमाएर ६५ रन मात्रै बनाउन सक्यो । राससका प्रेम नेपालीले सर्वाधिक ३७ रन बनाए भने भुपाल केसीले २२ रन बनाउनबाहेक अन्य ब्याट्सम्यानले रन बनाउन सकेनन् । बलिङमा क्रिकेट सङ्घका खेमराज भट्टले तीन विकेट लिए भने नरेन्द्रराज भट्टले एक विकेट लिए ।
पहिलो खेलमा बैङ्कर्स टोलीले सात विकेटले महाकाली अस्पतालको टोलीलाई पराजित गरेको थियो । पहिले ब्याटिङ गरेको महाकाली प्रादेशिक अस्पतालको टोलीले निर्धारित १० ओभेरमा सात विकेट गुमाएर ६८ रन मात्रै बनाउन सक्यो । अस्पतालका रोहित भट्टले १९ रन बनाए । यसैगरी, किसन सिंह विष्टले १० रन बनाउँदा समीर श्रेष्ठले १७ रन बनाउनबाहेक अन्यले दोहोरो अङ्कमा रन बनाउन सकेनन् । बलिङमा बैङ्कर्स टोलीका हरिश चन्दले तीन विकेट लिए भने किसन भट्ट, भगत बुढा र वासुदेव जोशीले एकरएक विकेट लिए ।
जवाफी ब्याटिङमा उत्रिएको बैङ्कर्स टोलीले नौ ओभरमा लक्ष्य पूरा गर्यो । उसका लागि ललित कलौनीले सर्वाधिक २१ रन बनाए । त्यसैगरी पुष्कर विष्टले १६ रन बनाउँदा गौतम मिश्रले ११ रनको योगदान गरे । बलिङमा महाकाली अस्पतालका भुपेस चटौत, रमेश नाथ र दीपक महराले एकरएक विकेट लिए ।
उपाधि विजेता टोलीलाई कञ्चनपुरका प्रमुख जिल्ला अधिकारी नारायण सापकोटाले ट्रफी प्रदान गरेका थिए । समापन समारोहमा प्रजिअ सापकोटाले राससको वार्षिकोत्सवका अवसरमा शुभकामना व्यक्त गर्दै मैत्रीपूर्ण क्रिकेटले यहाँको खेलको विकासमा सहयोग पुग्ने बताए । कार्यक्रममा जिल्ला प्रहरी कार्यालयका प्रमुख चक्रराज जोशी, पत्रकार महासङ्घ कञ्चनपुरका अध्यक्ष सुरेश धामी, वरिष्ठ पत्रकार चित्राङ्ग थापा, जिल्ला क्रिकेट सङ्घ कञ्चनपुरका अध्यक्ष वीरेन्द्रबहादुर चन्द र महाकाली प्रादेशिक अस्पताल व्यवस्थापन समितिका अध्यक्ष कृष्णानन्द भट्टले शुभकामना मन्तव्य राखेका थिए । कार्यक्रममा जिल्ला क्रिकेट सङ्घका पदाधिकारी, पत्रकार महासङ्घका पदाधिकारी, स्थानीय बुद्धिजीवी, खेलाडीलगायतको उपस्थिति रहेको थियो ।
-1745755950.jpg)
