काठमाडौं । नेपालले १९ औं एसियाली खेलकुद अन्तर्गत टि-२० आई पुरुष क्रिकेटमा मंगोलियामाथि २ सय ७३ रनको विश्व कीर्तिमानी जित हात पारेको छ । नेपालले जितको लागि दिएको ३ सय १५ रनको विशाल कीर्तिमानी विजयी लक्ष्य पछ्याएको मंगोलिया १३.१ ओभरमा ४१ रनमा अलआउट भयो ।
नेपालको यो टि-२० आई इतिहासकै सबैभन्दा ठूलो जित हो । यसअघि सन् २०१९ मा चेकरिपब्लिकनले टर्कीविरुद्ध २ सय ५७ रनको कीर्तिमानी जित हात पारेको थियो । त्यस्तै, क्यानडाले सन् २०२१ मा पानामामाथि २ सय ८ रनको फराकिलो जित हात पारेको थियो ।
मंगोलियाका लागि दावासुरेनले २३ बलमा २ चौकासहित सर्वाधिक १० रन बनाएका थिए । मंगोलियाका अन्य कुनैपनि ब्याटरले दोहोरो अंकमा रन बनाउन सकेनन् । मंगोलियाका ५ ब्याटर शुन्य रनमा आउट भएका थिए भने तीन ब्याटरले मात्र समान १/१ रन जोड्न सकेका थिए ।
मंगोलियालाई सस्तैमा समेट्न नेपालका तीव्र गतिका बलर करन केसी, अभिनाश बोहरा, सन्दीप लामिछानेले समान २/२ विकेट लिएका थिए । तीव्र गतिका बलर सोमपाल कामी, दिपेन्द्र सिंह ऐरी र कुशल भुर्तेलले समान १/१ विकेट लिएका थिए ।
त्यसअघि, चीनको हांग्जाउमा टस हारेर सुरुआती ब्याटिङ गरेको नेपालले निर्धारित २० ओभरमा ३ विकेट गुमाएर कीर्तिमानी विशाल ३ सय १४ रन बनाएको थियो । नेपालले टि-२० आई इतिहासमा पहिलो पटक ३१४ रनको उच्च योगफल बनाएको हो ।
कुशल मल्लले विश्व कीर्तिमानी शतक र दीपेन्द्र सिंह ऐरीले कीर्तिमानी अर्धशतक प्रहार गर्दा नेपालले टि-२० आईमा कीर्तिमानी स्कोर बनाएको हो । नेपालका लागि कुशल मल्ल ५० बलमा ८ चौका र १२ छक्कासहित सर्वाधिक १ सय ३७ रनमा नटआउट रहेका थिए ।
कुशल मल्लले ३४ बलमै शतक प्रहार गरेका थिए । कुशल टि-२० आई इतिहासमा सर्वाधिक छिटो शतक प्रहार गर्ने ब्याटर बनेका छन् । यसअघि टि-२० आईमा भारतका रोहित शर्मा, दक्षिण अफ्रिकाका डेविड मिलर र चेकरिपब्लिकनका सुदेश विक्रम शेखरले समान ३५ बलमा शतक बनाएका थिए ।
नेपालबाट भने २०१९ मा पारस खड्काले सिंगापुरविरुद्ध ४९ बलमा शतक पूरा गरेका थिए । विष्फोटक ब्याटिङ गरेका दीपेन्द्रसिंह ऐरी १० बलमा ८ छक्कासहित ५२ रनमा क्रिजमा नटआउट रहे । दीपेन्द्रले ९ बलमै अर्धशतक पूरा गरेका थिए । दीपेन्द्रले भारतीय ब्याटर युवराज सिंहको १२ बलको कीर्तिमान तोडेका हुन् ।
कप्तान राहित पौडेल २७ बलमा २ चौका र ६ छक्कासहित ६१ रनमा आउट भएका थिए । तेस्रो विकेटका लागि कुशल मल्ल र रोहित पौडेलले १ सय ९३ रनको साझेदारी गरेका थिए । यो कुनैपनि खेलमा नेपाली ब्याटरले गरेको उच्च साझेदारी हो ।
नेपालका ओपनर कुशल भुर्तेल २३ बलमा २ चौकासहित १९ रनमा र आसिफ शेख १७ बलमा २ चौकासहित १६ रनमा क्याच आउट भएका थिए । मंगोलियाका लागि इरडेनबुलगन, जमेनसुरेन र अल्टनखुयागले समान १/१ विकेट लिएका थिए ।
नेपाल प्रतियोगिताको समूह 'ए' मा रहेको छ । नेपालले आफ्नो समूह चरणको अन्तिम खेल आइतबार माल्दिभ्ससँग खेल्नेछ । माल्दिभ्सले दोस्रो रोजाईको टोली पठाएको छ । आइसिसी टि-२० विश्वकप एसिया रिजनल क्वालिफायर ए जुधेको कारण माल्दिभ्सले दोस्रो रोजाईको टोली पठाएको हो ।
नेपालको क्वाटरफाइनल औपचारिकता मात्रै बाँकी देखिन्छ । नेपालले क्वाटरफाइनलमा भारत, पाकिस्तान, श्रीलंका, बंगलादेश र अफगानिस्तान मध्य एक टोलीसँग खेल्नुपर्ने हुन्छ । एसियाडमा क्रिकेटलाई नेपालले पदकको दाबेदार टोलीको रुपमा हेरिएको छ ।
-1731995984.jpg)
