काठमाडौं । नेपालले मलेसियामा आजबाट सुरु आइसिसी महिला टि–२० विश्वकप एसिया क्षेत्र छनोटमा विजयी सुरुआत गरेको छ । क्वालालम्पुरस्थित वायुमास ओभल क्रिकेट मैदानमा नेपालले घरेलु टोली मलेसियालाई ५ रनले पराजित गरेको हो ।
मलेसियासँगको जितसँगै नेपालको सेमिफाइनल सम्भावना मजबुत बनेको छ । नेपालले जितको लागि दिएको ८५ रनको मध्यम विजयी लक्ष्य पछ्याएको मलेसियाले निर्धारित २० ओभरमा ९ विकेट गुमाएर ७९ रन मात्र बनायो ।
मलेसियाका लागि कप्तान विनीफ्रेड दुराईसिंघमले ३९ बलमा १ चौकासहित सर्वाधिक २८ रन बननाइन् । ओपनर ऐना आमिजाह १४ रन, मास एलिसा १० रन, महिमाह ९ रन र वान जुलिया वान २ रनमा आउट भइन् ।
नेपालका लागि कविता जोशीले २ ओभरमा ५ रन खर्चेर २ विकेट लिएकी थिइन् । कविता कुँवरले ४ ओभरमा १० रन खर्चेर २ विकेट लिइन् । कप्तान रुविना क्षेत्री र अश्मिना कर्माचार्यले समान १/१ विकेट लिईन् ।
त्यसअघि, टस हारेर पहिला ब्याटिङको निम्तो पाएको नेपालले निर्धारित २० ओभरमा ५ विकेट गुमाएर ८४ रन बनाएको थियो । नेपालकी सीता रानामगर ५४ बलमा १ चौकासहित सर्वाधिक ३८ रनमा अविजित रहिन् । अप्सरी बेगम ३८ बलमा १ चौकासहित १७ रनमा आउट भइन् ।
कप्तान रुबिना क्षेत्रीले १३ बलमा २ चौकासहित १२ रन बनाउनु बाहेक अन्य ब्याटरले दोहोरो अंकमा रन बनाउन सकेनन् । नेपालले पहिलो ओभरको सुरुवाती तीन बलमै ओपनर काजोल श्रेष्ठ, सम्झना खाड्का र इन्दु बर्मालाई शून्यमा गुमाएको थियो ।
छैटौं विकेटका लागि सीता र अप्सरी बेगमले ५१ रनको महत्वपूर्ण साझेदारी गरेका थिए । मलेसियाका लागि ऐना हामिजाले ४ ओभरमा १ मेडनसहित १४ रन खर्चेर २ विकेट लिइन् । महिराह इजाती, ऐश्या एलिसा र निक नुरले समान १/१ विकेट लिईन् ।
नेपालले अव शुक्रबार बहराइनसँग, आइतबार भुटानसँग, मंगलबार कतारसँग र बुधबार युएईसँग खेल्नेछ । समूह ‘ए’ मा नेपाल, बहराइन, भुटान, मलेसिया, कतार र युनाइटेड अरब इमिरेट्स (युएई) छन् । समूह ‘बी’ मा चीन, हङकङ, कुवेत, म्यानमार र थाईल्यान्ड छन् ।
प्रतियोगिताबाट हरेक समूहका शीर्ष दुई टोलीले सेमिफाइनलमा स्थान बनाउने छन् । आइसिसी महिला टि–२० विश्वकप एसिया क्षेत्र छनोटमा ११ टिम सहभागी हुँदा दुई टिमले सन् २०२४ मा बंगलादेशमा हुने महिला टी–२० विश्वकपमा स्थान पक्का गर्ने छन् ।
-1732963344.jpg)
