काठमाडौं । नेपाली राष्ट्रिय क्रिकेट टीमले इतिहासमै पहिलो पटक विश्व च्याम्पियन टोली पाकिस्तानसँग एसिया कपको उद्धघाटन खेलमा आज बुधबार खेल्दैछ । नेपाल र घरेलु टोली पाकिस्ताानबीचको खेल नेपाली समय अनुसार दिउँसो ३ः१५ बजेदेखि मुल्तान क्रिकेट रंगशालामा हुनेछ ।
नेपालको कप्तानी रोहितकुमार पौडेलले र पाकिस्तानको कप्तानी विश्व वरियताको एक नम्बरमा रहेका ब्याट्सम्यान बाबर आजमले गर्नेछन् । बाबर आजम र शाहिन शाह अफ्रिदी जस्ता विश्वका उत्कृष्ट ब्याटर र बलर भएका पाकिस्तानविरुद्ध आज नेपाली टीमले आफ्नो उत्कृष्ट क्रिकेट खेल्न चाहन्छ ।
एसिया कपमा नेपालले ओडिआई क्रिकेट वरीयतामा शीर्ष स्थानको पाकिस्तानसँग आज र तेस्रो स्थानको महाशक्ति राष्ट्र भारतसँग भदौ १८ गते ४ सेप्टेम्बरमा श्रीलंकाको क्यान्डीमा प्रतिस्पर्धा गर्नेछ । नेपाली खेलाडीका लागि पाकिस्तान, भारतसँग खेल्नु सपनाभन्दा कम होइन ।
पाकिस्तान र भारतसँग नेपालको प्रदर्शन कस्तो होला भन्ने विषयमा अनेक टिप्पणी भइरहेका छन् । समर्थकहरू त यति उत्साहित छन् की बाबर आजम वा मोहम्मद रिजवानको विकेट कुन नेपाली बलरले लिने हो जस्ता अनेक कल्पना गरिरहेका छन् ।
नेपाली क्रिकेट यतिबेला अहिलेसम्मकै उचाइमा रहेको छ । एसीसी प्रिमियर कपको च्याम्पियन बन्दै नेपालले एसिया कपमा स्थान बनाएको हो । ओडिआई वरियता शीर्ष स्थानको पाकिस्तानविरुद्ध आज १५ औं स्थानको नेपालले आफ्नो उत्कृष्ट क्रिकेट खेल्दै विश्वलाई देखाउन चाहन्छ ।
खेलअघि मंगलबार भएको पत्रकार सम्मेलनमा नेपालका कप्तान रोहितकुमार पौडेलले दुवै टिममा विश्वस्तरीय ब्याट्सम्यान र बलर भएको उल्लेख गर्दै नेपालले कडा टक्कर दिने बताएका थिए । पाकिस्तानी कप्तान बाबर आजमले एसिया कपको सहभागीताले नेपालमा क्रिकेटको विकासमा सहयोग पुग्ने धारणा राखेका थिए ।
एकदिवसीय विश्वकप लिग टूका पछिल्ला १२ मध्य ११ खेलमा जित निकाल्दै नेपाल एक दिवसीय विश्वकप छनोट खेल्न पाएको थियो भने एकदिवसीय मान्यता जोगाउन सफल भएको थियो । एशिया कपमा नेपालले हार्ने केही छैन । त्यसलाई कसरी स्मरणीय बनाउने र पाउने मात्र हो ।
यसैबीच, नेपालविरुद्धको खेलको लागि पाकिस्तानले प्लेइङ–११ सार्वजनिक गरेको छ । बाबर आजमको कप्तानीमा रहेको टोलीमा मोहम्मद रिजवान, फखर जमान, इमाम उल हक, आघा अली सलमान र इफ्तिखर अहमद लगायत टोलीमा छन् ।
नेपालविरुद्ध पाकिस्तानको प्लेइङ–११ :
फखार जमान, इमाम उल हक, बाबर आजम (कप्तान), मोहम्मद रिजवान(विकेटकिपर), अघा अली सलमान, इफ्तिखर अहमद, सादब खान, मोहम्मद नवाज, शाहिन शाह अफ्रिदी, नसिम शाह र हरिस रौफ ।
नेपाली राष्ट्रिय क्रिकेट टोली :
रोहितकुमार पौडेल (कप्तान), आसिफ शेख (विकेटकिपर), कुशल भुर्तेल, ललित राजवंशी, भीम सार्की, कुशल मल्ल, दीपेन्द्रसिंह ऐरी, सन्दीप लामिछाने, करण केसी, गुलशन झा, आरिफ शेख, सोमपाल कामी, प्रतिश जिसी, किशोर महतो, सन्दीप जोरा, अर्जुन साउद (विकेटकिपर) र मौसम ढकाल ।
-1790615620.jpg)
-1790577148.jpg)
-1789698769.jpg)
