काठमाडौँ । सातौं नम्बरमा ब्याटिङ गरेका विकेटकिपर शायन जहांगिरको शतकमा आईसीसी एकदिवसीय विश्वकप छनोट प्रतियोगिता अन्तर्गत आफ्नो दोस्रो खेलमा अमेरिकाले नेपाललाई २०८ रनको विजयी लक्ष्य दिएको छ ।
जिम्बावेको राजधानी हरारेमा रहेको टाकासिंगा स्पोर्टस् क्लब क्रिकेट मैदानमा टस हारेर ब्याटिङमा उत्रिएको अमेरिका ४९ ओभरमा २ सय ७ रनमा अलआउट भयो । अमेरिकाका लागि सातौं नम्बरमा ब्याटिङ गरेका शायन जहांगिरले ७९ बलमा १० चौका र ३ छक्काको सहयोगमा अविजित १ सय रनको सानदार शतकीय ईनिङ खेलेका थिए ।
शायनको यो अन्तर्राष्ट्रिय करिअरको कुनैपनि खेलको पहिलो शतक हो । एक समय तीव्र गतिका बलर करण केसीको घातक बलिङसँगै १८-४ को दयनीय अवस्थामा पुगेको अमेरिकालाई खेलमा फर्काउन शायनले सानदार शतक हानेका थिए ।
स्पिनर ललितनारायण राजवंशीले सुशान्त मोदानीलाई ४२ रनमा बोल्ड आउट गरेका थिए । स्वीप खेलेका मोदानी मिस भएपछि बोल्ड हुन पुगेका थिए । उनले ७१ बलमा ३ चौका र १ छक्का प्रहार गरे । वेस्टइन्डिजविरुद्ध शतक हानेका गजानन्द सिंह ४१ बलमा २ चौका र १ छक्कासहित २६ रनमा आउट भएका थिए ।
गजानन्द स्पिनर दीपेन्द्रसिंह ऐरीको २२ औं ओभरको तेस्रो बलमा फस्ट स्लिपमा आरिफ शेखबाट उत्कृष्ट क्याच आउट हुन पुगेका थिए । आउट साइड एज लागेको बल विकेटकिपर आसिफ शेखको खुट्टामा लागेर आरिफ शेखले क्याच लिएका थिए । पाँचौ विकेटका लागि गजानन्द र सुशान्तले ७३ बलमा ४७ रनको साझेदारी गरेका थिए ।
तीव्र गतिका बलर करण केसीले दोस्रो ओभरको पाँचौं बलमा ओपनर स्टिभ टेलरलाई ४ रनमा एलबीडब्लू आउट गरेका थिए । गतवर्ष स्टिभ टेलरले नेपालविरुद्ध आफ्नो घरेलु मैदानमा १ सय १४ रनको सानदार शतकीय इनिङ खेलेका थिए ।
त्यसको लगत्तै करणले अर्को बलमा युवा ब्याटर साइतेजा मुकामल्लालाई शून्यमा आउट गरे । साइतेजा आरिफ शेखबाट फस्ट स्लिपमा क्याच आउट भएका थिए । करणले आठौं ओभरको पाँचौं बलमा अमेरिका कप्तान आरोन जोन्सलाई कुशल भुर्तेलबाट क्याच आउट गराएका थिए ।
करणले दशौं ओभरको दोस्रो बलमा नोष्तुश केन्जिगेलाई एक रनमा स्लिपमा आरिफ शेखबाट क्याच गराएपछि अमेरिका संकटमा पुगेको थियो । जेसी सिंह १२ रनमा र निसर्ग पटेल ८ रनमा आउट भएका थिए ।
नेपालका लागि तीव्र गतिका बलर करण केसीले ९ ओभरमा ३ मेडनसहित ३३ रन खर्चेर सर्वाधिक ४ विकेट लिएका थिए । गुलशन झाले १० ओभरमा ५२ रन खर्चेर ३ विकेट लिए । दीपेन्द्रसिंह ऐरीले ५ ओभरमा १५ रन खर्चेर २ विकेट लिए । स्पिनर ललितनारायण राजवंशीले १० ओभरमा २० रन खर्चेर १ विकेट लिएका थिए ।
-1771765636.jpg)
-1772020629.jpg)
-1772114666.JPG)
-1770731452.JPG)
-1769858079.jpg)
-1770898199.JPG)
-1771081584.JPG)
