विश्व प्रसिद्ध फुटबल खेलाडी म्याराडोनाको निधन

WORLD CUP

Home
WORLD CUP
विश्व प्रसिद्ध फुटबल खेलाडी म्याराडोनाको निधन

विश्व प्रसिद्ध फुटबल खेलाडी म्याराडोनाको निधन

खेलकुद मञ्‍च 2077-8-11

काठमाडौं, मंसिर ११ । विश्वप्रसिद्ध फुटबलर डिएगो म्याराडोनाको ६० वर्षको उमेरमा निधन भएको छ । अर्जेन्टिनाका पूर्व खेलाडी तथा प्रशिक्षकसमेत रहेका म्याराडोनाको मस्तिष्कमा रगत जमेर केही समयअघि शल्यक्रिया गरिएको थियो । उनको हृदयघातका कारण निधन भएको हो । उनको गत बुधबार अचानक हृदयघातका कारण निधन भएको हो ।

अन्तर्राष्ट्रिय मिडियाका अनुसार तीन साताअघि मात्रै उनको मस्तिष्कको शल्याक्रिया गरिएको थियो । म्याराडोना विश्वभर सर्वकालिन चर्चित फुटबलर हुँदा हुँदै विवादित छवि भएका अर्जेन्टिनी खेलाडी थिए । लागूऔषध सेवन तथा दुर्व्यवहारका कारण उनी बारम्बार चर्चा र विवादमा आउने गरेका थिए । उनका वकिलले मिडियाहरुलाई दिएको सूचना अनुसार उनको घरमै हृदयघातका कारण निधन भएको हो ।

म्याराडोनाको कप्तानीमा अर्जेन्टिनाले १९८६ को विश्वकप जितेको थियो । त्यसबेला विश्व फुटबलमा दबदबा कायम गरेको इङ्ल्याण्डलाई अर्जेन्टिनाले हराएको थियो । त्यसभन्दा पनि प्रमुख कुरा इङ्ल्याण्डसँग अर्जेन्टिनाले युद्ध हारेको लगत्तै उक्त विश्वकप भएको थियो । जुन जितलाई म्याराडोनाले फकल्याण्ड टापु हार्दाको इङ्ल्याण्डसँग बदलाको रुपमा पनि अर्थ्याएका थिए । यद्यपि म्याराडोनाले हातले गोल हानेको कुरा जितको घोषणापछि मात्रै थाहा भयो । जुन गोललाई म्याराडोनाले ’ईश्वरको हात’ भनिदिए । जुन घटना र प्रसंग अझै विश्व फुटबल इतिहासमा स्मरणीय मानिन्छ । त्यसपछिका केही वर्षमा अर्जेन्टिनी फुटबलको उचाइ र प्रभाव बढ्नुमा म्याराडोनाको महत्वपूर्ण भूमिका मानिन्छ । उनले अर्जेन्टिनाका लागि चारवटा विश्वकप खेले भने ९१ खेलमा ३४ गोल गरे । सन् १९९० को विश्वकपमा पनि अर्जेन्टिना फाइनलसम्म पुगेको थियो । फाइनलमा तत्कालीन पश्चिम जर्मनीबाट पराजित भयो ।

सन् १९९१ मा लागुपदार्थ सेवन गरेको पुष्टि भएपछि उनलाई १५ महिना प्रतिबन्ध लगाइएको थियो । उनले सन् १९९७ मा व्यावसायिक फुटबलबाट सन्यास लिएका थिए । त्यति बेला उनी ३७ वर्षका थिए । सन् २००८ मा उनलाई अर्जेन्टिना फुटबल टिमको प्रशिक्षक नियुक्त गरिएको थियो । उनको प्रशिक्षणमा २०१० को विश्वकप मैदानमा ओर्लिएको अर्जेन्टिना क्वार्टर फाइनलमा जर्मनीबाट पराजित भयो ।

उनी बारम्बार खेलमा प्रतिबन्धित हुनुका साथै अत्याधिक लागूऔषध सेवनका कारण सुधारगृहमा समेत बस्नु परेको थियो । १९९९ र २००० मा पनि उनी मुटु सम्बन्धी समस्याका कारण अस्पताल भर्ना हुनु परेको थियो । २००४ मा फेरि स्वासप्रस्वास तथा लागूऔषध सेवनबाट उत्पन्न स्वास्थ्य समस्याका कारण अस्पतालमा उनको उपचार गरियो । अहिले उनको निधनको खबरसँगै थुप्रै प्रसंशकहरुले सामाजिक सञ्जालमार्फत दुख व्यक्त गरेका छन् । एजेन्सी

प्रकाशित मिति: बिहीबार, मंसिर ११, २०७७ ०७:११