विश्वकप छनोटको फाइनल चरणबाट नेपाल बाहिरियो, टोली भोलि स्वदेश फर्किँदै

WORLD CUP

Home
WORLD CUP
विश्वकप छनोटको फाइनल चरणबाट नेपाल बाहिरियो, टोली भोलि स्वदेश फर्किँदै

2076-04-12 विश्वकप छनोटको फाइनल चरणबाट नेपाल बाहिरियो, टोली भोलि स्वदेश फर्किँदै

खेलकुद मञ्‍च 2076-04-12

काठमाडौं, साउन १२ । आईसीसी टी–२० विश्वकपको एसियाली छनोटको फाइनल चरणबाट नेपाल बाहिरिएको छ । विश्वकपको ग्लोबल छनोटका लागि छानिन असफल भएसँगै नेपाली राष्ट्रिय क्रिकेट टोली भोलि स्वदेश फर्किने भएको हो ।

नेपाली टीम मलेसियन एयरलाइन्सको विमानबाट भोलि राति साढे १० बजे त्रिभुवन अन्तर्राष्ट्रिय विमानस्थलमा अवतरण गर्ने नेपाली टोलीका टेक्निकल एनालिस्ट रमन शिवाकोटीले जानकारी दिए । शिवाकोटीका अनुसार सन्दीप लामिछाने र सोमपाल कामी भने स्वदेश फर्किने छैनन् । दुबै ग्लोबल टी–२० मा सहभागी हुन आज राति नै क्यानडा प्रस्थान गर्ने छन् ।

मलेसिया र कुवेतलाई हराएको नेपाल कतार र सिंगापुरसँग पराजित भयो । प्रतियोगिताकै बलियो टिम नेपालको क्रिकेट कमजोर देखिँदा कप्तान पारस खड्का आफ्नो स्तरको क्रिकेट नै खेल्न नसकेको बताउँछन् । आइतबार फाइनल सरह बनेको समूह चरणको अन्तिम खेलमा त नेपालको बलिङ, ब्याटिङ दुबै कमजोर रह्यो । यसले नेपाली टिम टी–२० विश्वकपसम्म पुग्न चुक्यो । एसिया छनोटको फाइनल चरणमा नेपालले देखाएको खेलले ग्लोबल छनोटमा पुग्ने स्तर नरहेकै देखिनु दुःखद छ । त्यसैले कप्तान पारस खड्का भन्छन, ‘यो हाम्रो स्तरको क्रिकेट नै होइन ।’ उनका अनुसार सिंगापुरले निकै राम्रो क्रिकेट खेल्यो, उनीहरुको बलिङ र ब्याटिङ दुबै उत्कृष्ट थियो ।

आइतबार सिंगापुरले दिएको एक सय ९२ रनको विशाल लक्ष्य पछ्याएको नेपाल एक सय नौ रनमै समेटिएको हो । विशाल लक्ष्य पछ्याएको नेपालका कुनै ब्याट्सम्यानले जिम्मेवारीपूर्ण ब्याटिङ नगर्दा सिंगापुर ८२ रनले विजयी भयो । जितसँगै सिंगापुर टी–२० विश्वकप क्रिकेटको ग्लोबल छनोटमा पुग्न सफल भएको छ । निर्धारित २० ओभरको खेलमा १५ ओभर मात्रै मैदानमा टिक्न सकेको नेपालका चार खेलाडीले मात्र दोहोरो अंकमा रन बनाउन सकेका थिए । उपकप्तान ज्ञानेन्द्र मल्लले सर्वाधिक ३९ तथा दीपेन्द्रसिंह ऐरीले २३ रन जोडे । कप्तान पारस खड्काले १२ रन बनाउँदा सोमपाल कामीले ११ रनको पारी खेले ।

मैदान प्रवेश गर्ने बित्तिकै लामो सट हान्न खोज्नु नेपाली ब्याट्सम्यानको मुख्य कमजोरी बन्यो । विकेट गए पनि लामो साझेदारी गर्दै टिमलाई जिताउन सकिन्छ भन्नेमा कुनै पनि ब्याट्सम्यान विश्वस्त देखिएनन् । निकै हतारमा देखिएका नेपाली ब्याट्सम्यान सिंगापुरका बलरसामु निरीह सावित बनेका थिए । सिंगापुरलाई जिताउन सेलाडोर विजयकुमार एक्लैले चार विकेट हात पारे । चार ओभरको स्पेलमा उनले २५ रन मात्र खर्चिएका थिए । विनोथ भास्करणको नाममा दुई विकेट रह्यो । यसअघि इन्डियन एसोसियसन ग्राउन्डमा टस जितेर पहिले ब्याटिङ गरेको सिंगापुरले निर्धारित २० ओभरमा ६ विकेटको क्षतिमा एक सय ९१ रनको योगफल खडा गरेको हो ।

प्रकाशित मिति: आइतबार, साउन १२, २०७६ १३:०७