काठमाडौं । ई-स्पोटर्स संघ नेपाल (इशान)को आयोजना तथा नेपाल प्लेजको व्यवस्थापनमा हुने दोस्रो ई-स्पोटर्स राष्ट्रिय च्याम्पियनसीपको सम्पूर्ण तयारी पूरा भएको छ । च्याम्पियनसिपको अन्तिम चरणका खेलहरु बिहीबारदेखि त्रिपुरेश्वरस्थित दशरथ रंगशालाको कभर्डहलमा भौतिक रुपमा हुनेछ । जहाँ ६ विभिन्न विधामा भौतिक रुपमा प्रतिस्पर्धा गराइनेछ ।
ईशानका अध्यक्ष अन्जन धमलाले च्याम्पियनसिपको सम्पूर्ण तयारी पूरा भएको बताए । अध्यक्ष धमलाले भने, ‘दोस्रो संस्करणको ई स्पोटर्स राष्ट्रिय च्याम्पियनसिपको सबै तयारी पूरा भएको छ । पहिलो संस्करण सुर्खेतमा भएको थियो । दोस्रो संस्करण अझ भव्य रुपमा आयोजना हुँदैछ । काठमाडौंमै भौतिक रूपमा हुने भएकोले यसको क्रेस अझ बढ्नेछ । पछिल्लो समय नेपालमा स्पोटर्सको क्रेज बढिरहेकोले यो माईलस्टोन ईभेन्ट हुनेछ ।’
दोस्रो इ-स्पोटर्स नेसनल च्याम्पियनसीपमा पब्जी मोबाइल, ई-फुटबल, मोबाइल लिजेण्ड्स, डोटा टू, भ्यालोरेन्ट र कस प्ले विधामा प्रतिस्पर्धा हुनेछ । आयोजकले छनोट चरण, समूह चरण र प्लेअफ खेलाएर अन्तिम चरणमा खेल्ने टिमको टुङ्गो लगाएको हो ।जसअनुसार पब्जी मोइबलमा १६ टिमले प्रतिस्पर्धा गर्ने छन् । प्लेअफमा २४ टिमले प्रतिस्पर्धा गरेकोमा शीर्ष १६ टिम अन्तिम चरणका लागि छानिएका हुन् ।
यस्तै, मोबाइल लेजेण्ड्समा दुई टिमले अन्तिम चरणमा प्रतिस्पर्धा गर्ने छन् । यसैगरी भ्यालोरेन्ट र डोटा टु मा ३–३ टिम अन्तिम चरणमा छनोट भएका छन् । इ-फुटबलमा अन्तिम चरणमा १६ खेलाडी छनोट भएका छन् । क्वालिफायर र प्लेअफका खेलहरु अनलाइनमा भएको थियो भने च्याम्पियनसीपको अन्तिम चरणको खेल फागुन ८ देखि १० गतेसम्म त्रिपुरेश्वरस्थित दशरथ रंगशालको कभर्डहलमा आयोजना गर्न लागिएको हो ।
पब्जीमा अन्तिम चरणमा छनोट भएका १६ टिममा लियो इ-स्पोटर्स, डिबरएस गेमिङ, रोएल गुर्खाज इस्पोट्र्स, टि टु के इ-स्पोटर्स, रोएल ड्रागन इ-स्पोर्टस, हइन इ-स्पोर्टस, फोर योन्को लक्की क्याट, ड्रिम टु डेस्टिनेसन, ट्राइब एरोमेसी, आरसी ३२ इ-स्पोर्टस, फोर डेथ मेसिन, सोल्टी स्क्वाड, दाई इ-स्पोर्टस, नेप्क्स, जुट्टी स्क्वाड, फ्युचर एलिएन्स छन् । डोटा टुमा किर्तिपुर, स्नेक हारु, एभेन्जर्स छन् । भालोरेन्टमा नो टक ओनली किल, अरकान, काल्म डाउनले छन् । मोबाइल लेजेण्ड्सतर्फ हमिङ बड्र्स, औरा छन् । इ फुटबलमा अन्तिम चरणमा राजेश बिसी, आशुतोष विक्रम कार्की, प्रियम मगर, हृज्वान श्रेष्ठ, स्वप्निल अधिकारी, अनिश श्रेष्ठ, बुद्धि बहादुर भट्टराई, सन्दिप गोले तामाङ, निमेश श्रेष्ठ, उदिप महर्जन, सन्देश थापा, वियज लामा तामाङ, अमन रायमाजी, दावा नोर्बु शेर्पा, विशाल राई, दिपक भट्टराई छन् ।
च्याम्पियनसीपको कुल पुरस्कार राशी २५ लाख रहेको छ । जसबाट ६ विधाको विजेता तथा उपविजेता खेलाडीहरुलाई पुरस्कार प्रदान गरिनेछ । हरेक इभेन्टको पुरस्कार राशी फरक हुनेछ । जसमा पब्जी मोबाइल सबैभन्दा चर्चित विधाको रुपमा छ र यसमा कूल १० लाख १० हजार पुरस्कार राशी राखिएको छ । जसमा विजेताले नगद २ लाख ५० हजार पाउनेछन् । दोस्रोले १ लाख ८० हजार तथा तेस्रोले १ लाख २० हजार पाउनेछन् भने अन्तिम चरणमा प्रतिस्पर्धा गर्ने १६ वटै टिमले नगद पुरस्कार पाउनेछन् । यस विधामा एमभीपीले पनि नगद पुरस्कार पाउने छन् ।
यस्तै मोबाइल लेजेण्ड्समा ५ लाख २० हजार पुरस्कार राशी रहेको छ । जसमा विजेताले १ लाख ८२ हजार हात पार्नेछन् भने उपविजेताले १ लाख ४ हजार पाउनेछन् । यसमा शीर्ष ८ मा रहनेले नगद पुरस्कार प्राप्त गर्नेछन् । यस विधामा पनि एमभीपीले नगद पुरस्कार पाउने छन् ।
भ्यालोरेन्टमा ३ लाख, इ फुटबलमा २ लाख १० हजार, डोटा टु मा २ लाख र कस प्लेमा १ लाख ५० हजार पुरस्कार राशी रहेको आयोजकले जनाएको छ । भ्यालोरेन्ट र डोटा टु को विजेताले समान १ लाख ५ हजार हात पार्नेछन् भने इ फुटबलमा विजेताले ९० हजार र कस प्ले विजेताले ७० हजार नगद पुरस्कार प्राप्त गर्ने छन् । भ्यालोरेन्ट र डोटा टु मा पनि शीर्ष ८ मा रहनेले नगद पुरस्कार पाउनेछन् भने इ फुटबल र कसप्लेमामा शीर्ष चारमा रहनेले नगद पुरस्कार पाउने छन् । मोस्ट पपुलर कसप्लेअरले पनि नगद पुरस्कार पाउने छन् ।
-1760234771.jpg)