एनएमबि–कपअन अन्तर स्कुल फुटबल प्रतियोगिता हुने

शैक्षिक खेलकुद

Home
शैक्षिक खेलकुद
एनएमबि–कपअन अन्तर स्कुल फुटबल प्रतियोगिता हुने

एनएमबि–कपअन अन्तर स्कुल फुटबल प्रतियोगिता हुने

खेलकुद मञ्‍च बुधबार, साउन १७, २०८०

काठमाडौं । एनएमबि–कपअन अन्तर स्कुल यु–१४ फुटबल प्रतियोगिता यही साउन महिनामा हुने भएको छ । प्रतियोगिता बुढालनिलकण्ठ नगरपालिका–१० स्थित कपनमा रहेको कपअन स्पोर्ट्स सेन्टरमा आगामी २४ गतेदेखि २६ गतेसम्म हुने भएको हो ।

इन्डोर फुटबल ग्राउन्डमा तीन दिन सञ्चालन हुने सो फुटबल प्रतियोगिताको लागि आयोजक कपअन स्पेर्ट्स सेन्टरले बुधबार एनएमबि बैंकसँग प्रायोजन सम्झौता गरेको छ । सम्झौता–पत्रमा स्पोर्ट्स सेन्टरका प्रमुख कार्यकारी अधिकृत दामोदर (बद्री) भट्टराई र एनएमबि बैंकका नायब प्रमुख कार्यकारी अधिकृत सुदेश उपाध्यायले हस्ताक्षर गरेका छन् । स्पोर्ट्स सेन्टरले आफ्नै इन्डोर फुटबल ग्राउन्ड (बालुवाखानी, कपन) सहित राजधानीका विभिन्न स्थानमा युवा खेलाडी उत्पादनका लागि काठमाडौं किकर्स फुटबल एकेडेमी सञ्चालन गरिरहेको छ ।

स्पोर्ट्स सेन्टरका प्रमुख कार्यकारी अधिकृत भट्टराईले भने, ‘ग्रासरुट फुटबलको विकासको लागि प्रतियोगिता आयोजना गर्न लागिएको हो । यसमा साथ दिनुभएकोमा देशकै अग्रणी वित्तिय संस्था एनएमबि बैंकलाई धेरै–धेरै धन्यवाद । हाम्रो सहकार्यले सानै भएपनि नेपाली फुटबलमा खेलाडी उत्पादनको लागि सहयोग पुग्ने विश्वास गरेका छौं ।’ भट्टराई अखिल नेपाल फुटबल संघ (एन्फा) का सहायक महासचिव समेत हुन् ।

आयोजक कपअन स्पोर्ट्स सेन्टरले प्रतियोगितामा काठमाडौं उपत्यकाका १६ वटा विद्यालयका छात्रको टिम सहभागि हुने जानकारी गराएको छ । प्रतियोगिता लिगकम नकआउटको आधारमा हुने छ । उपाधि विजेता, द्वितीय, तृतीय हुने टिमसहित प्रतियोगिताकै सर्वोत्कृष्ट खेलाडी, उत्कृष्ट गोलकिपर र सर्वाधिक गोलकर्तालाई पुरस्कार प्रदान गरिने छ ।

प्रकाशित मिति: बुधबार, साउन १७, २०८० २३:१५