काठमाडौं । भाररतमा जारी इन्डियन प्रिमियर लिग आइपीएलमा मुम्बईमाथि लखनउले रोमान्चक जित निकालेको छ । एकना क्रिकेट रंगशालामा मंगलबार राती भएको ६३ औं खेलमा लखनउ सुपर जायन्ट्सले मुम्बई इन्डियन्सलाई ५ रनले पराजित गरेको हो ।
मुम्बईका कप्तान रोहित शर्माले टस जितेर लखनउलाई पहिले ब्याटिङको निम्तो दिएका थिए । घरेलु मैदानमा लखनउले निर्धारित २० ओभरमा ३ विकेट गुमाएर १ सय ७७ रन बनाएको थियो । जवाफमा मुम्बईले ५ विकेट गुमाएर १ सय ७२ रन मात्रै बनाउन सकेको थियो ।
मुम्बईलाई जितको लागि अन्तिम ओभरमा ११ रन चाहिँएको थियो । तीव्र गतिका युवा बलर मोहसिन खानले क्यामरुन ग्रीन र टिम डेविडलाई मात्रै पाँच रन दिएपछि घरेलु टोली लखनउले रोमान्चक जित हात पारेको हो ।
.jpg)
मुम्बईका लागि ओपनर तथा विकेटकिपर ईशान किशनले ३९ बलमा ८ चौका र १ छक्कासहित सर्वाधिक ५९ रनको अर्धशतकीय ईनिङ खेलेका थिए । कप्तान रोहित शर्मा २५ बलमा १ चौका र ३ छक्कासहित ३७ रनमा आउट भए । रोहित र ईशानले पहिलो विकेटका लागि ५८ बलमा ९० रनको साझेदोरी गर्दै उत्कृष्ट सुरुआत दिलाएका थिए ।
त्यसपछि, सूर्यकुमार यादव ७ रन, विष्णु विनोद २ रन र नेहल वढेरा १६ रन बनाएर प्याभिलियन फर्किए । टिम डेभिडले अन्तिमसम्म टोलीलाई जिताउन सक्दो प्रयास गरे उनले १९ बलमा १ चौका र ३ छक्कासहित अविजित ३२ रन बनाए भने क्यामरुन ग्रीनले ६ बलमा ४ रन बनाका थिए ।
लखनउका लागि लेगस्पिनर रवि विश्रोईले ४ ओभरमा २६ रन खर्चेर २ विकेट लिएका थिए । यस्तै, यश ठाकुरले ४ ओभरमा ४० रन खर्चेर २ विकेट लिए । अन्तिम ओभरमा नायक बनेका मोहसिन खानले ३ ओभरमा २६ रन खर्चेर १ विकेट लिएका थिए ।
.jpg)
त्यसअघि, टस हारेर पहिले ब्याटिङ गरेको घरेलु टोली लखनउले निर्धारित २० ओभरमा ३ विकेट गुमाउँदै १ सय ७७ रन बनाएको थियो । लखनउका लागि मार्कस स्टोईनिसले ४७ बलमा ४ चौका र ८ छक्काको सहयोगमा अविजित ८९ रनको अर्धशतकीय ईनिङ्स खेलेका थिए ।
कप्तान क्रुणाल पाण्ड्या ४२ बलमा १ चौका र १ छक्कासहित ४९ रनमा खुट्टामा समस्याका कारण रिटायर्ट हर्ट आउट भएका थिए । सुरुआतको ३५ रनमा ३ विकेट गुमाएको लखनउका लागि स्टोईनिस तथा पान्ड्याले ५९ बलमा ८२ रनको महत्वपुर्ण साझेदारी गरेका थिए । ओपनर क्विटन डि ककले १५ बलमा १६ रन, दीपक हुडा ५ रन र प्रेराक माङ्कड गोल्डेन डक पेभेलिएन फर्काएका थिए ।
.jpg)
मुम्बईका लागि जेसन बेहर्नडोर्फले ४ ओभरमा ३० रन खर्चेर २ विकेट लिए । पियुष चवालाले ३ ओभरमा २६ रन खर्चेर १ विकेट लिएका थिए । मुम्बईका लागि तीव्र गतिका बलर क्रिस जोर्डन ४ ओभरमा बिना विकेट ५० रन खर्चेर महँगो साबित भएका थिए ।
जितसँगै लखनउ १३ खेलमा ७ मा जित र ५ मा हार तथा एक खेलमा अंक बाँडेर १५ अंकका साथ तेस्रो स्थानमा उक्लिएको छ । पराजित मुम्बई १३ खेलमा ७ मा जित र ६ मा हारसहित १४ अंक जोडेर चौथो स्थानमा झरेको छ । चेन्नई १३ खेलमा ७ मा जित र ५ मा हार तथा एक खेलमा अंक बाँडेर १५ अंक भएपनि नेटरनरेटका कारण दोस्रो स्थानमा रहेको छ ।
.jpg)
दश टोली सहभागी आइपिएलमा अहिलेसम्म प्लेअफको टिकट सुरक्षित गरिसकेको गुजरात १३ खेलबाट ९ जित र ४ हारका साथ १८ अंकसहित तालिकाको शीर्ष स्थानमा रहेको छ । हैदराबाद र दिल्ली भने प्लेअफ दौडबाट बाहिरिसकेका छन् ।
यस्तै, बैंग्लोर, राजस्थान र कोलकाताको समान १२/१२ अंक रहेको छ । तीनमध्ये बैंग्लोरले २ खेल तथा राजस्थान र कोलकाताले समान १/१ खेल मात्र खेल्न बाँकी रहेको छ । यस्तै, आठौँ स्थानमा रहेको पञ्जाबले १२ खेलबाट १२ अंक जोडेको छ । पञ्जाबले लिग चरणमा अझै २ खेल खेल्न बाँकी रहेकाले प्लेअफ सम्भावना कायमै रहेको छ ।
-1731995984.jpg)
