काठमाडौं । एन्टोनी चम्कँदा इंग्लिस प्रिमियर लिग फुटबलमा म्यानचेस्टर युनाईटेडले सहज जित निकालेको छ । आइतबार राति द सिटी ग्राउन्ड नटिङघममा भएको खेलमा युनाईटेडले घरेलु टोली नटिङघम फरेस्टलाई २-० गोल अन्तरले हराएको हो ।
युनाईटेडको जितमा ब्राजिली विंगर एन्टोनी र डिएगो डालोटले एक/एक गोल गरे । खेलको ३२ औं मिनेटमा एन्टोनीले गोल गर्दै युनाईटेडलाई सुरुआती अग्रता दिलाएका थिए ।त्यसपछि, खेलको ७६ औं मिनेटमा एन्टोनीको पासमा डालोटले गोल गर्दै युनाईटेडलाई २-० को सहज जित दिलाएका थिए ।
जितसँगै युनाइटेड ३० खेलबाट ५९ अंक जोडेर तेस्रो स्थानमा उक्लिएको छ । म्यानचेस्टर युनाइटेडले न्यूक्यासल युनाइटेडलाई पछि पारेको हो । पराजिट नटिङहम ३१ खेलबाट २७ अंक जोडेर रेलिगेसन जोनको १८ औं स्थानमा रहेको छ ।
बुकायो साका पेनाल्टीमा चुक्दा वेस्ट ह्याम युनाइटेडसँग आर्सनल बराबरीमा रोकियो
.jpg)
गएराति नै भएका अर्को खेलमा आर्सनल घरेलु टोली वेस्ट ह्याम युनाइटेडसँग २-२ गोलको बराबरीमा रोकिएको छ । लन्डन स्टेडियममा आर्सनलका गाब्रियल जिसस र मार्टिन ओडेगार्डले गोल गर्दा वेस्ट ह्यामका सेद बेन्रहमा र जारोड वोवेनले बराबरी गोल फर्काएका थिए ।
खेलको सातौं मिनेटमा बेन ह्वाइटको पासमा गाब्रियल जिससले गोल गर्दै आर्सनललाई सुरुआती अग्रता दिलाएका थिए । दशौँ मिनेटमा गाब्रियल मार्टिनेलीको पासमा कप्तान मार्टिन ओडेगार्डले गोल गर्दा आर्सनल २-० ले अघि रह्यो । खेलको ३३ औं मिनेटमा सेद बेन्रहमाले पेनाल्टीमार्फत गोल गर्दै वेस्ट ह्यामलाई २-१ को स्थितिमा ल्याएका थिए ।
.jpg)
खेलको ५२ औं मिनेटमा आर्सनलका बुकायो साकाले पेनाल्टीमा गोल गर्न सकेनन् । त्यसपछि, खेलको ५४ औं मिनेटमा जारोड वोवेनले गोल गर्दै वेस्ट ह्यामलाई २-२ गोलको बराबरीमा ल्याएका थिए । बराबरीसँगै शीर्ष स्थानको आर्सनलले ३१ खेलमा ७४ अंक जोडेको छ । एक खेल कम खेलेको म्यानचेस्टर सिटीको ७० अंक रहेको छ । वेस्ट ह्याम ३१ अंक जोडेर १५ औं स्थानमा रहेको छ ।
-1731995984.jpg)
