सासोउलोसँग युभेन्ट्स पराजित, उडिनेसमाथि रोमाको सहज जित

अन्तर्राष्ट्रिय

Home
अन्तर्राष्ट्रिय
सासोउलोसँग युभेन्ट्स पराजित, उडिनेसमाथि रोमाको सहज जित

सासोउलोसँग युभेन्ट्स पराजित, उडिनेसमाथि रोमाको सहज जित

खेलकुद मञ्‍च 2080-1-4

काठमाडौं । इटालियन सिरी ‘ए’ फुटबलमा सासोउलोसँग युभेन्ट्स पराजित भएको छ । मापेई स्टेडियमा आइतबार राति भएको खेलमा युभेन्ट्सलाई सासोउलोले १-० गोल अन्तरले हराएको हो ।

घरेलु मैदानमा सासोउलोको जितमा ग्रेगोइरे डिफ्रिलले निर्णायक गोल गरे । खेलको दोस्रो हाफमा एन्ड्रिया पिनामोन्टीको स्थानमा मैदान छिरेका डिफ्रिलले ६४ औं मिनेटमा निर्णायक गोल गरेका थिए ।

युभेन्ट्सले घरेलु टोलीमाथि दवाव राखेपनि गोल गर्न नसक्दा पराजित हुन पुग्यो । युभेन्ट्स जनवरीमा अवैध स्थानान्तरण गतिविधि गरेको आरोपका १५ अंक घटाइएपछि सिरी ‘ए’ मा शीर्ष ६ भन्दा बाहिर रहेको छ । युभेन्ट्स ३० खेलबाट ४४ अंक जोडेर सातौं स्थानमा रहेको छ । जितसँगै सासोउलोले ३० खेलमा ४० अंक जोडेर दशौँ स्थानमा उक्लिएको छ ।

उडिनेसमाथि रोमाको सहज जित

सिरी ‘ए’ कै अर्काे खेलमा रोमाले उडिनेसलाई ३-० गोल अन्तरले पराजित गरेको छ । रोमाको जितमा खेलको ३७ औं मिनेटमा इडोआर्डो बोभले, ५५ औं मिनेटमा कप्तान लोरेन्जो पेलेग्रिनीले र इन्जुरी समयमा वैकल्पिक खेलाडी ट्याम्मी अब्राहमले गोल गरेका थिए ।

रोमाका ब्रायन क्रिस्टान्टेले र उडिनेसका रोबर्टाे पेरेराले पेनाल्टी चुकाएका थिए । यस जितसँगै रोमा ३० खेलबाट ५६ अंक जोडेर तेस्रो स्थानमा उक्लिएको छ । पराजित उडिनेस ३९ अंक जोडेर १२ औं स्थानमा रहेको छ ।