पोखरा, मंसिर २२ । १३औँ साग भारोत्तोलनअन्तर्गत नेपालले तेस्रो दिन शनिबारको प्रतियोगितामा दुई रजत र चार कास्य पदक जित्न सफल भएको छ । योसँगै जारी संस्करणमा नेपालको पदक संख्या दुई स्वर्ण, दुई रजत र १० कास्य पुगेको छ ।
रोचक के छ भने, पदक तालिकामा नेपाली महिला र पुरुष खेलाडीले समान स्वर्ण, समान रजत र समान कास्य जितेका हुन् । २० स्वर्णसहित ६० पदकका लागि भएको स्पर्धामा नेपालले अझै पुरुषतर्फ टु वेट क्याटागोरीमा अन्तिम दिन आइतबार खेल्दैछ । पोखरामा शनिबार भएको प्रतियोगितामा नेपालकी अस्मिता राई (८७ प्लस) र विशालसिंह बिष्ट (९६ केजी) तौल समुहमा रजत पदक जितेका हुन् ।
पुरुष ९६ केजी तौल समुहमा बंगलादेशका खेलाडी जाइरुल इस्लामले स्वर्ण जिते । उनले स्न्याचतर्फ १२० र क्लीन एण्ड जर्कमा १४२ गरी कूल २६२ भार उठाउँदै स्वर्ण पदक जितेका हुन् । रजत दिलाउने नेपाली खेलाडी बिष्टले स्न्याचमा १०७ र क्लीन एण्ड जर्कमा १४० गरी कूल २४७ भार बहन गरे । १९ वर्षे बिष्ट कञ्चनपुरका हुन् । चार वर्षदेखि भारोत्तोलन खेल्दै आएको बताउने उनले रजत दिलाउन सकेकोमा खुसी लागेको प्रतिक्रिया दिए ।
त्यस्तै, भारोत्तोलनमा पहिलो सहभागिता जनाएको भुटानले सो इभेन्टमा पहिलो कास्य जित्न सफल भयो । उसका लागि किन्ले ग्याल्सेनले कास्य पदक जितेका हुन् । उनले स्न्याचमा ८० र क्लीन एण्ड जर्कमा ९० सहित कूल एक सय ७० भार उठाउन सके । शनिबार नै भएको महिला ८७ प्लस तौल समुहमा श्रीलंकन खेलाडी तिमाली हापुथेनाले स्वर्ण जितिन् । उनले स्न्याचमा ८० र क्लीन एण्ड जर्कमा एक सय गरी कूल १८० तौल उठाइन् ।
नेपालको तर्फबाट नेपाली सेनाकी अस्मिता राईले स्न्याचमा ६० र क्लीन एण्ड जर्कमा ६५ गरी कूल १२५ तौल भार बहन गर्दै रजत दिलाउन सफल भएकी हुन् । सो इभेन्टमा पाकिस्तानकी फेरोज परविनले स्न्याचमा ५५ र क्लीन एण्ड जर्कमा ६० गरी कूल ११५ तौल उठाउँदै कास्यमा सीमित भइन् ।
त्यस्तै, महिला ८७ तौल समुहमा भारतले स्वर्ण, पाकिस्तानले रजत र नेपालले कास्य जित्यो । भारतकी अनुराधा पभुन्नराजले स्न्याचमा ९० र क्लीन एण्ड जर्कमा ११० गरी कूल दुई सय, पाकिस्तानकी रब्बीया राजाकले ६३, ७८ र १४१ तथा नेपालकी मनकुमारी कुमालले ६०, ७६ गरी कूल १३६ तौल उठाउँदै क्रमशः स्वर्ण, रजत र कास्य जितेका हुन् । तनहुँकी कुमालले आठौं राष्टिय खेलकुदमा रजत जितेकी थिइन् ।
उता, पुरुष १०२ केजी तौल समूहमा नेपालका तर्फबाट सन्देश गुरुङले कास्य जिते । प्रतियोगितामा पाकिस्तानी खेलाडी उस्मान अम्जाद राठोरले स्वर्ण र बंगलादेशले रजत पदक जित्यो । पाकिस्तानी खेलाडीले स्न्याचमा १५० र क्लीन एण्ड जर्कमा १८० गरी कूल ३३० तौल उठाउँदै स्वर्ण जितेका हुन् ।
यस्तै, बंगलादेशका इस्लामले स्न्याचमा १०८ र क्लीन एण्ड जर्कमा १४२ गरी कूल २५० भार बहन गरी रजत र नेपालका सन्देशले स्न्याचमा एक सय र क्लीन एण्ड जर्कमा १३५ सहित कूल २३५ उठाउँदै कास्य पदक दिलाएका हुन् । चितवन निवासी सन्देश नेपाल प्रहरीमा आबद्ध छन् । उनी आठौं राष्ट्रिय खेलकुद प्रतियोगिताका स्वर्णधारी हुन् ।
शनिबार बिहान भएको खेलमा नेपालकी तारादेवी पुनले ७६ केजी तौल समुह र लक्ष्मी वनले ८१ केजी तौल समूहमा कास्य पदक जितेका छन् । महिला ७६ केजी तौल समूहमा बंगलादेशकी माविया अख्तरले स्न्याचमा ८० र क्लीन एण्ड जर्कमा १०५ गरी कूल १८५ तौल उठाउँदै स्वर्ण जितिन् । त्यस्तै, श्रीलंकन खेलाडी बीसी प्रियन्थीले स्न्याचमा ८३ र क्लीन एण्ज जर्कमा १०१ गरी कूल १८४ किलो तौल बहन गरी देशलाई रजत पदक दिलाइन् । १२औं सागमा समेत कास्य जितेकी नेपालकी तारादेवीले स्न्याचमा ७५ र क्लीन एण्ड जर्कमा ९७ गरी कूल १७२ तौल उठाएकी हुन् ।
त्यस्तै, ७६ केजी तौल समूहमा भारतकी सृष्टि सिंहले स्न्याचमा ८२ र क्लीन एण्ड जर्कमा १०८ गरी कुल १९० भार गरी स्वर्ण र बंगलादेशकी जुहोरा खातोन नीशाले कुल १६८ किलो तौल उठाउँदै रजत जित्न सफल भइन् । उनले स्न्याचतर्फ ७३ र क्लीन एण्ड जर्कमा ९५ तौल उठाएकी हुन् । ३ देशमात्र सहभागी सो इभेन्टमा नेपाल प्रहरीमा आबद्ध लक्ष्मी वनले स्न्याचमा ६० र क्लीन एण्ड जर्कमा ८० गरी कुल १४० तौल उठाउँदै कास्य दिलाउन सफल भएकी हुन् ।
-1789698769.jpg)
