१२औँ दक्षिण एशियाली शारिरीक सुगठन प्रतियोगिता साउन २ देखि

राखेप/एनओसी

Home
राखेप/एनओसी
१२औँ दक्षिण एशियाली शारिरीक सुगठन प्रतियोगिता साउन २ देखि

१२औँ दक्षिण एशियाली शारिरीक सुगठन प्रतियोगिता साउन २ देखि

खेलकुद मञ्‍च 2076-03-18

काठमाडौं, असार १८ । नेपाल शारिरीक सुगठन तथा फिटनेस् संघद्वारा आयोजना गर्न लागेको १२औँ दक्षिण एशियाली शारिरीक सुगठन प्रतियोगिता आगामी आउन २ गतेदेखि शुरु हुने भएको छ । साउथ एसिया बडीबिल्डिङ्ग एण्ड फिटनेस् फेडेरेशन (एसएबीबीएफ)को तत्वावधानमा संघले 12^th South Asian BodyBuilding & Physique Sports Championship 2019 आगामी असार २ देखि ५ गतेसम्म काठमाडौंको प्रज्ञा भवनमा गर्ने भएको हो ।

संघको प्रेस विज्ञप्तिका अनुसार उक्त प्रतियोगिताको समुद्घाटन उपराष्ट्रपति नन्दबहादुर पुनद्वारा गरिने भएको छ । उक्त प्रतियोगिताले नेपाल भ्रमण वर्ष–२०२० लाई समेत सार्थक बनाउन आवश्यक टेवा पुग्ने विश्वास संघले लिएको छ ।

दक्षिण एसियाका मुलुकहरुले भाग लिने यस प्रतियोगितामा शारीरिक सुगठन विधाअन्तर्गत ५५ केजी, ६० केजी, ६५ केजी, ७० केजी, ७५ केजी, ८० केजी, ८५ केजी, ९० केजी तथा सो भन्दा माथिका तौल समुहले प्रतिस्पर्धा गर्ने भएका छन् । त्यस्तै, प्रथम पटक शारीरिक सुगठन प्रतियोगिताको विधा अन्तर्गत जुनियर पुरुष शारीरिक सुगठन, पुरुष फिटनेस फिजिक्स, पुरुष एथेलेटिक्स फिजिक्स प्रतियोगिता (३ वटा उचाई समुह), पुरुष स्पोर्टस् फिजिक्स(२ वटा उचाई समुह) महिला एथलेटिक्स फिजिक्स तथा महिला मोडल फिजिक्स खुल्ला उचाई समुह गरी जम्मा १८ समुहमा प्रतियोगिता संचालन हुनेछ ।
अहिलेसम्म दक्षिण एशियाली प्रतियोगितामा शारीरिक सुगठन खेल मात्रै समावेश गरिएकोमा यस प्रतियोगितामा प्रथम पटक आयोजक नेपालले पुरुष तथा महिला विधाको प्रतिस्पर्धाको शुरुवातसमेत गरेको विज्ञप्तिमा उल्लेख छ । नेपालमा हुने यस प्रतियोगिता न्यूट्रल भेन्युको रुपमा हुने भएकाले सबै दक्षिण एशियाली देशका खेलाडी एवं अफिसियलहरुको उल्लेख्य उपस्थित हुने जनाइएको छ ।
चार दिनसम्म चल्ने यस प्रतियोगिताको पहिलो दिन साउन २ गते सातै राष्ट्रका खेलाडीलाई स्वागत कार्यक्रम तथा खेलाडी रजिष्ट्रेशन गरिने छ । श्रावण ३ गते उपराष्ट्रपतिबाट उक्त प्रतियोगिताको समुद्घाटन र प्रतियोगिताको प्रिजजिङ्ग तथा फइनल खेल क्रमैसँग संचालन हुनेछ । र, उपराष्ट्रपतिबाटै उक्त प्रतियोगिताको मिस्टर साउथ एसिया ओभरअल च्याम्पियन एवं टिम च्याम्पियनको पुरस्कार वितरण गरिने जनाइएको छ भने साउन ४ गते समापन एवं विदाई कार्यक्रम रहेको छ ।
यस प्रतियोगितामा खेलाडीहरुको अहिलेसम्मकै उच्च सहभागिता अर्थात करिब एक सय ३० जना खेलाडीहरुले सहभागिता जनाउने विज्ञप्तिमा उल्लेख छ । त्यस्तै, प्रतियोगिताको अनुमानित बजेट एक करोड ३९ लाख रुपैयाँ रहेको छ भने यस प्रतियोगितालाई राष्ट्रिय खेलकुद परिषद्लगायतका विभिन्न संघ संस्थाहरुले आर्थिक सहयोग गर्ने जनाइएको छ ।

प्रकाशित मिति: बुधबार, असार १८, २०७६ १८:०७