काठमाडौं । नेपाल पुलिस क्लब पाँचौँ कृष्ण प्रसाद भट्टराई स्मृति राष्ट्रिय कराते प्रतियोगिताको टिम च्याम्पियन बनेको छ । ७ स्वर्ण, समान ३ रजत र कास्यसहित १३ पदकका साथ च्याम्पियन बनेको छ । एपिएफ दोस्रो र त्रिभुवन आर्मी क्लब तेस्रो भएको छ ।
एपिएफले ६ स्वर्ण, ३ रजत र ४ कास्य सहित १३ पदक जित्यो म आर्मीले ४ स्वर्ण, ६ रजत र १ कास्य पदक प्राप्त गर्न सफल भयो । सातदोबाटो स्थित कराते एकेडेमीमा सबै १७ वटा इभेन्टको फाइनल आज भएको हो ।
पुरुष ५० केजीमा पुलिसका राकेश मानन्धरले स्वर्ण पदक जिते । राकेशले फाइनलमा गण्डकी प्रदेशका बमिन गुरुङलाई ६-१ ले हराए । सुदूरपश्चिम प्रदेशका गजेन्द्र साउद र नेपाल पुलिस क्लबका सुजन तामाङले कास्य पदक जितेका छन् ।
पुरुष ८४ केजी मुनिको तौल समूहमा एपिएफका मोहम्मद शेखु आलमले स्वर्ण पदक जितेका छन् । शेखु फाइनलमा कृष्ण बुढा मगरलाई ७-० ले हराए ।
पुलिसका सुरज राजबाहक त गण्डकीका रोशन गरन्जाले कास्य पदक प्राप्त गरे । महिला ६८ केजी मुनिको तौल समूहको फाइनलमा पुलिसकी आशिका राईले आर्मीकी सम्पदा केसीलाई १-० ले हराउँदै स्वर्ण पदक जितिन् ।
लुम्बिनीकी रबिना घर्ती मगर र बागमतीकी उरुषा पहारीले कास्य पदक प्राप्त गरिन् । महिला ४५ केजी मुनिको तौल समूहमा पुलिसकी वर्षा बुढा मगरले स्वर्ण पदक जितिन् । वर्षाले फाइनलमा एपिएफकी आस्था लुहारलाई ९-० ले पराजित गरिन् ।
मधेशकी अज्मी अली त लुम्बिनीकी बिन्दु जिएमले कास्य पदक प्राप्त गरे । पुरुष ५५ केजी तौल समूहमा एलोन श्रेष्ठ च्याम्पियन भएका छन् । एलोनले फाइनलमा बागमतीका निशान घिसिङलाई ६-४ ले हराए ।
गण्डकीका सन्दीप तामाङ र कोशीका अरुण कुमार लिम्बूले कास्य पदक जिते । महिला ५० केजी मुनिको तौल समूहको फाइनलमा एपिएफकी अन्जली महर्जनले बागमतीकी पर्वती श्रेष्ठलाई ९-१ ले हराउँदै स्वर्ण पदक जितेकी छिन् ।
आर्मीकी नविना डिमडुङ र मधेशकी मनिता मोक्तानले कास्य पदक जिते । पुरुष ६० केजी मुनिको तौल समूहमा एपिएफका मीनबहादुर तामाङले स्वर्ण पदक जिते । मीनबहादुरले फाइनलमा मधेशका रितेश थिङलाई ७-० ले हराए ।
बागमतीका सुबिन सुनार र सुदूरपश्चिमका विष्णु विकले कास्य पदक प्राप्त गरे । महिला ५५ केजी मुनिको तौल समूहमा आर्मीकी प्रियंका शाहीले पुलिसकी सविना श्रेष्ठलाई ७-२ ले हराउँदै स्वर्ण पदक जितेकी हुन् ।
गण्डकीकी निशा पुन मगर र सृजना खुलालले कास्य पदक प्राप्त गरे । पुरुष ६७ केजी मुनिको तौल समूहमा एपिएफका प्रदीप बैजाली प्रदीप मगरले स्वर्ण पदक जिते । उनले फाइनलमा पुलिसका सन्तोष श्रेष्ठ लाई ५-२ ले हराए ।
कोशीका सन्देश मगर र बागमतीका मिलन नेपालीले कास्य पदक प्राप्त गरे । महिला ६१ केजी मुनिको तौल समूहमा पुलिसकी निरुपा तामाङ दोङले स्वर्ण पदक जितिन् । निरुपाले फाइनलमा श्रद्धा सुनार लाई ८-३ ले हराएकी हुन् ।
एपिएफकी सोनिया तिरुवा र रन्जना चाम्लिङले कास्य पदक प्राप्त गरे । आर्मीका सिबु ओडले पुरुष ७५ केजी मुनिको तौल समूहमा स्वर्ण पदक जितेका छन् ।
सिबुले फाइनल पुलिसका राजीव पुडासैनीलाई हराए । कोशीका मनोज विश्वकर्मा र एपिएफका अनिल बरामले कास्य पदक जिते । रोमान्चक प्रतिस्पर्धाका बीच आर्मीकी श्रद्धा थापाले महिला ६८ केजी माथिको तौल समूहमा स्वर्ण पदक जितिन् ।
श्रद्धाले फाइनलमा एपिएफकी महिमा राईलाई ८-७ ले हराइन् । कोशीकी सुमना उराँव र सुदूरपश्चिमकी करुणा बडुवालले कास्य पदक प्राप्त गरे ।
पुरुष ८४ केजी तौल समूहमा तेन्जिङ शेर्पाले स्वर्ण पदक जिते । तेन्जिङले आर्मीका सुरेश जापरेललाई ९-० ले हराए । बागमतीका अजय ब्लोन र गण्डकीका उज्ज्वल बासुलाले कास्य पदक प्राप्त गरे ।
एकल कातामा स्वनिम लगातार चौथो पटक च्याम्पियन :
नेपाल पुलिस क्लबका स्वनिम मानन्धर र त्रिभुवन आर्मी क्लबकी सानुमाया थिङ एकल कातामा च्याम्पियन बनेका छन् । स्वनिम लगातार चौथो पटक पुरुष एकल कातामा स्वर्ण पदक जितेका छन् ।
आज फाइनलमा स्वनिमले आर्मीका प्रविण मानन्धरलाई हराए । एपिएफका अन्जन यसस्माली मगर र कोशी प्रदेशका खगेन्द्र चाम्लिङ राईले कास्य पदक जिते ।
महिला टिम काताको महिला पुलिस च्याम्पियन बनेको छ। पुलिसले फाइनलमा आर्मीलाई हरायो । बागमती र सुदूरपश्चिम प्रदेशले तेस्रो स्थान प्राप्त गर्यो ।
पुरुष टिम कातामा पनि पुलिस च्याम्पियन बनेको छ। आर्मीले रजत, बागमती र एपिएफले कास्य पदक प्राप्त गर्यो । पुलिसकी वर्षा बुढा मगर महिला र एपिएफका प्रदीप बैजाली मगर पुरुषतर्फको वेस्ट फाइटर घोषित भए ।
उनीहरूले नेपाल कराते महासंघका उपाध्यक्ष महेन्द्रबहादुर सिंहबाट सौजन्य प्राप्त २५ हजार रुपैयाँ प्राप्त गरे । कोशी सृजना खुलाल महिला र सुदूरपश्चिमका विष्णु विक पुरुषतर्फको उदीयमान खेलाडीले घोषित भए ।
उनीहरूले अर्बजाको गी प्राप्त गरे । टिम च्याम्पियनले पुलिसले ट्रफीसहित १ लाख ५० हजार, दोस्रो एपिएफले ७५ हजार र तेस्रो आर्मीले ३५ हजार रुपैयाँ प्राप्त गर्नेछ ।
बागमती प्रदेशका मुख्यमन्त्री इन्द्रबहादुर बानियाँ, बागमतीका पूर्व युवा तथा खेलकुद मन्त्री मीनकृष्ण महर्जन, बागमती प्रदेश खेलकुदका सदस्य सचिव दीपक लामालगायतले विजेता खेलाडीलाई पुरस्कृत गरे ।
गोदावरी नगरपालिका र बागमती प्रदेश खेलकुद विकास परिषदको मुख्य सहयोग रहेको प्रतियोगितामा बागमती गाउँपालिकाले पनि सहयोग रहेको थियो ।
बागमती प्रदेशका निवर्तमान युवा तथा खेलकुद मन्त्री मीनकृष्ण महर्जनको परिकल्पनामा तथा जिल्ला प्रमुख डोजो, ललितपुर, लगनखेनको आयोजनामा बिहीबार सुरु भएको प्रतियोगितामा ७ प्रदेश र ३ विभागका गरी २ सय १० खेलाडीले फाइट र काता गरी १७ इभेन्टमा प्रतिस्पर्धा गरेका थिए ।
-1777125056.jpg)
-1776856363.jpg)
