नेपाल पुलिस क्लबलाई झापा महिला गोल्डकपको उपाधि

फुटबल

Home
फुटबल
नेपाल पुलिस क्लबलाई झापा महिला गोल्डकपको उपाधि

नेपाल पुलिस क्लबलाई झापा महिला गोल्डकपको उपाधि

काठमाडौं । विभागीय टोली एपीएफलाई पराजित गर्दै झापा महिला गोल्डकप फुटबल प्रतियोगिताको उपाधि नेपाल पुलिस क्लबले जितेको छ । झापाको शिवसताक्षीमा रहेको दूधे रंगशालामा सोमबार भएको फाइनल खेलमा पुलिसले एपीएफलाई १–० गोलले हराएको हो ।

खेलको २१औं मिनेटमा मिना देउवाले गरेको गोलनै निर्णायक बन्यो । नेपाल पुलिस क्लबले संकटा एफसीलाई र एपीएफले नेपाल आर्मीलाई हराउँदै फाइनल प्रवेश गरेका हुन् ।

उपाधिसँगै पुलिस क्लबले नगद रु १० लाख १० हजार, मेडल र ट्रफी प्राप्त गरेको छ भने उपविजयी एपिएफ फुटबल क्लबले नगद रु पाँच लाख प्राप्त गरेको छ । गोल्डकपमा सर्वाधिक गोलकर्ता भएकी मिना देउवाले सर्वोत्कृष्ट खेलाडीको समेत उपाधि हात पारिन् । उनले प्रतियोगिता अवधिभर ७ गोल गर्दै गोल्डकपकी टप स्कोरर बनेर २५ हजार र सर्वोत्कृष्ट खेलाडी बन्दै १ लाख ५० हजार रुपैयाँ प्राप्त गरिन् ।

फाइनलमा प्लेयर अफ द म्याचको उपाधि पुलिसकी पूजा रानाले जितिन् । त्यसैगरी, उत्कृष्ट गोलकिपरमा नेपाल पुलिस क्लबकी उषा नाथ, उत्कृष्ट रक्षकमा एपीएफकी मनमाया दमाई, उत्कृष्ट मध्यपंक्तिमा एपीएफकी रेनुका नगरकोटी, उत्कृष्ट अग्रपंक्तिमा एपीएफकी अनिता बस्नेत, उत्कृष्ट प्रशिक्षकमा पुलिस क्लबका भोला सिलवाल र उदयमान खेलाडी त्रिभुवन आर्मी क्लबकी जेनिफर राना मगर भइन् । सबै उत्कृष्ट विजेताले समान २५ हजार रुपैयाँ प्राप्त गरे ।

प्रकाशित मिति: सोमबार, कात्तिक २५, २०८२ २२:०६