इन्टरनेशनल वुमेन्स च्याम्पियनसिप: नेपाल उपविजेता

फुटबल

Home
फुटबल
इन्टरनेशनल वुमेन्स च्याम्पियनसिप: नेपाल उपविजेता

इन्टरनेशनल वुमेन्स च्याम्पियनसिप: नेपाल उपविजेता

खेलकुद मञ्‍च बिहीबार, फागुन १५, २०८१

काठमाडौं । इन्टरनेशनल वुमेन्स च्याम्पियनसिपको उपाधि म्यानमारले जितेको छ । बुधबार त्रिपुरेश्वरस्थित दशरथ रगंशालमा सम्पन्न खेलमा घरेलु टोली नेपाललाई २-० ले हराउँदै उपाधि चुमेको हो ।

निकै रोमान्चक बनेको फाइनल खेलमा पहिलो हाफ गोलरहित बराबरीमा रोकिएको थियो । त्यसपछि खेलको ६२औँ मिनेटमा म्यानमारले गोल गर्दा नेपालविरुद्ध अग्रता लिएको थियो । यो हारसँगै नेपाल १३औंपल्ट अन्तर्राष्ट्रिय प्रतियोगितामा उपविजेतामा सीमित भएको छ । नेपालले समग्रमा खेलेको यो १३औं अन्तर्राष्ट्रिय प्रतियोगिताको फाइनल थियो । नेपाल यसअघि साफ महिला च्याम्पियनसिपमा ६, दक्षिण एसियाली खेलकुदमा तीन तथा वाफ, हिरो महिला गोल्डकप र नादेज्दा कपमा समान एकपल्ट उपविजेता बनेको थियो । अर्कोतर्फ नेपालले एकै वर्षमा हार बेहोरेको यो तेस्रो फाइनल हो । गत फागुनमा साउदी अरबमा सम्पन्न वाफ महिला च्याम्पियनसिपको फाइनलमा जोर्डनसँग टाइब्रेकरमा ५–३ ले पराजित भएको थियो । गत कात्तिक दशरथ रंगशालामै भएको साफ महिला च्याम्पियनसिपको फाइनलमा पनि नेपाल बंगलादेशसँग २–१ ले पराजित भयो । तेस्रो प्रयासमा नेपालको विजेता बन्ने लक्ष्य बुनेको थियो । तर, यसपल्ट पनि प्राप्त अवसरलाई सदुपयोग गर्न नसक्दा नेपाल उपविजेतामै सीमित हुन पुगेको हो ।

पहिलो हाफमा म्यानमारलाई गोलरहित बराबरीमा रोकेको नेपाल दोस्रो हाफमा भने सम्हालिन सकेन । म्यानमारलाई ६२औँ मिनेटमा यु पर कियाङले अग्रता दिलाइन् । पहिलो गोल भएको दुई मिनेटपछि नै म्यानमारले नेपालविरुद्ध दोस्रो गोल गर्यो । म्यानमारको लागि पहिलो गोल कियाङले गरिन्, अञ्जिलालाई छक्याउँदै उनले प्रहार गरेको चिप बलले सिधै जाली चुम्यो । लगत्तै नेपालले अर्को गोल बेहोर्यो । म्यानमारकी कप्तान विन तुनको प्रहारलाई बचाउने क्रममा गीताको टाउकोमा बल लाग्दै पोस्टसम्म पुग्यो । त्यसपछि पनि दुवै टोलीले केही अवसर बुने पनि सफल हुन सकेन ।

म्यानमारले सम्पन्न प्रतियोगिताको पहिलो खेलमा लेबनानलाई ३-१ ले पराजित गरेको थियो भने दोस्रो खेलमा र्किगिस्तानलाई ५-० को गोलले हराएर एक खेलअघि नै फाइनलमा आफनो स्थान बनाएको थियो । प्रतियोगिता अन्तर्गत भएको अन्तिम खेलमा घरेलु टोलीलेसँग म्यानमारले २-२ को बराबरी खेलेको थियो । गता फागुन ५ गतेदेखि सुरु भएको प्रतियोगितामा आयोजक राष्ट्र नेपालसहित, लेबनान, र्किगिस्तान र म्यानमारले सहभागीता जनाएका थिए ।

प्रकाशित मिति: बिहीबार, फागुन १५, २०८१ ०८:४०