स्पोर्टिङ इलामलाई हराउँदै पोखरा थन्डर्स एनएसएलको शीर्ष स्थानमा

फुटबल

Home
फुटबल
स्पोर्टिङ इलामलाई हराउँदै पोखरा थन्डर्स एनएसएलको शीर्ष स्थानमा

स्पोर्टिङ इलामलाई हराउँदै पोखरा थन्डर्स एनएसएलको शीर्ष स्थानमा

काठमाडौं । राजधानीमा जारी दोस्रो संस्करणको नेपाल सुपर लिग एनएसएलमा अपराजित पोखरा थन्डर्सले स्पोर्टिङ इलाम एफसीलाई पराजित गरेको छ । त्रिपुरेश्वरस्थित दशरथ रंगशालामा बुधबार भएको खेलमा पोखरा थन्डर्सले स्पोर्टिङ इलामलाई १–० गोल अन्तरले हराएको हो ।

पोखरा थन्डर्सका लागि सञ्जिव विष्टले खेलको दोस्रो हाफमा निर्णायक गोल गर्दै जित दिलाएका हुन् । पोखरा थन्डर्सको जितमा खेलको ४७ औं मिनेटमा डिबक्स भित्र क्लियर हुन नसकेको बलमा सञ्जिव विष्टले गरेको गोल नै खेलको निर्णायक गोल बनेको थियो ।

जितसँगै पोखरा थन्डर्स दोस्रो संस्करणको एनएसएलमा अंक तालिकाको शीर्ष स्थानमा उक्लिएको छ । पोखराले ४ खेलबाट ८ अंक जोडेको छ । यसअघि एफसी चितवनलाई १–० गोल अन्तरले पराजित गरेको पोखरा ललितपुर सिटी एफसीसँग गोलरहित बराबरी र झापा एफसीसँग १–१ गोलको बराबरीमा रोकिएको थियो । पराजित स्पोर्टिङ इलाम ४ खेलबाट ३ अंकसहित छैटौं स्थानमा झरेको छ ।

स्पोर्टिङ इलामको यो लगातार दोस्रो हार हो । यसअघिको खेलमा इलाम बुटवल लुम्बिनी एफसीसँग २–१ गोल अन्तरको पराजय ब्यहोरेको थियो । त्यसअघि, उद्धघाटन खेलमा काठमाडौं रेजर्ससँग १–० गोल अन्तरले हारेको इलामले दोस्रो खेलमा एफसी झापामाथि १–० गोल अन्तरको जित हासिल गरेको थियो ।

आजको खेलमा उत्कृष्ट प्रदर्शन गर्दै निर्णायक गोल गरेका पोखरा थन्डर्सका सञ्जिव विष्ट खेलको ‘प्लेयर अफ द म्याच’ भएका थिए । दोस्रो संस्करणको एनएसएल प्रतियोगिता अन्तर्गत भोलि बिहीबार हुने खेलमा एफसी चितवन र बुटवल लुम्बिनी एफसीले साँझ ५ बजे प्रतिस्पर्धा गर्नेछन् ।