काठमाडौं । भुटानको पारो एफसीमाथि रोमाञ्चक जित निकाल्दै नेपालको मछिन्द्र फुटबल क्लब एएफसी कप छनोटको दोस्रो चरणमा प्रवेश गरेको छ । त्रिपुरेश्वस्थित दशरथ रंगशालामा मंगलबार भएको प्रारम्भिक चरणकाे खेलमा पाराे एफसीमाथि ३-२ गाेलअन्तरको जित निकाल्दै मछिन्द्र दोस्रो चरणमा प्रवेश गरेको हाे ।
मछिन्द्रकाे रोमाञ्चक जितमा विमल घर्तीमगर, आयुष घलान र अोलावाले आफिजले समान एक/एक गोल गरेका थिए । भुटानको पारो एफसीका लागि काजुअो हाेमाले र इभान आसान्टेले समान एक/एक गोल गरे । मछिन्द्रका फरवार्ड बिमल घर्तिमगर खेलको म्यान अफ दि म्याच घोषित भएका थिए ।
खेलको छैटौं मिनेटमा मछिन्द्रकाे डिफेन्डिङ लाइन कमजाेरीकाे फाइदा उठाउँदै यशी दोर्जीको पासमा काजुअो हाेमाले गाेल गर्दै पाराेलाई सुरूवाती अग्रता दिलाएका थिए । तर, खेलको १२अौं मिनेटमा आयुष घलानको क्रसमा विमल घर्तीमगरले हेडरमार्फत गोल गर्दै मछिन्द्रलाई बराबरीमा ल्याएका थिए ।
लगत्तै खेलको १५अौं मिनेटमा विमलले पेनाल्टी बक्स भित्रबाट मिलाएको पासमा आयुषले पहिलो टचमा सुन्दर गोल गर्दै मछिन्द्रलाई २-१ गाेलले अगाडी बढाएका थिए । ३९अौं मिनेटमा ओमोलाज करिमको क्रसमा आफिजले हेडमार्फत गोल गर्दा मछिन्द्रले पहिलो हाफमा नै ३-१ को अग्रता लियो ।
तर, दाेश्राे हाफमा मछिन्द्रमाथि पाराेले दवाव बनाउन सफल रहयाे । ७१अौं मिनेटमा मछिन्द्रका डिफेन्डर छिरिङ गुरूङलाई बिट गराउँदै पाराेका इभान आसान्टेले गाेल गर्दै अग्रता ३-२ गाेलअन्तरमा झारेपनि त्यो पर्याप्न बन्न सकेन ।
खेलको ७९अौं मिनेटमा करीमको फ्रिकिकले पोस्टको दिशा लिन सकेन । लगत्तै अर्कोतर्फ पारोको डरलाग्दो आक्रमण क्रसबार नजिकबाट आकाशिएको थियो भने ९०अौं मिनेटमा असान्टेको क्रसमा काजुअोको प्रहारलाई कप्तान विशालले बचाउ गर्दै मछिन्द्रको जित पक्का गरेका थिए ।
यसअघिको संस्करणमा श्रीलंकाको ब्लु स्टारसँग पराजित भएको मछिन्द्रले यसपटक भने भुटानको पारो एफसीमाथि जित दर्ता गर्यो । मछिन्द्रले अब आगामी साउन ३१ गते प्लेअफको दोस्रो चरणमा भारतीय क्लब मोहन बगान सुपर जायन्टको सामना गर्नेछ ।
कोलकातास्थित साल्ट लेक रंगशालामा हुने खेलको विजेताले समूह चरणमा स्थान बनाउन बंगलादेशको अवाहानी ढाका र माल्दिभ्सको क्लब इगल्सको विजेतासँग प्रतिस्पर्धा गर्नेछ ।
-1768216914.JPG)
-1767966059.jpg)
-1767965675.jpg)
-1766574885.jpg)