जापानमा पौडीका नासिरद्वारा अर्को नयाँ किर्तिमान

अन्तर्राष्ट्रिय

Home
अन्तर्राष्ट्रिय
जापानमा पौडीका नासिरद्वारा अर्को नयाँ किर्तिमान

जापानमा पौडीका नासिरद्वारा अर्को नयाँ किर्तिमान

खेलकुद मञ्‍च सोमबार, साउन ८, २०८०

काठमाडौं । नासिर याह्या हुसेनले जापानको फुकुओकामा आयोजना भएको २०औँ संस्करणको वर्ल्ड एक्वाटिक च्याम्पियनसिप २०२३ मा आफ्नो नाममा अर्को नयाँ राष्ट्रिय किर्तिमान राखेका छन् । नेपाल पौडी संघका अध्यक्ष अशोक बज्राचार्यका अनुसार आज सोमबार भएको २०० मिटर फ्रिस्टायलमा नासिरले १ मिनट ५७.२६ सेकेन्ड समयका साथ आफ्नो नाममा थप नयाँ राष्ट्रिय किर्तिमान बनाएका हुन् ।

यसअघि नासिरको नाममा १ मिनट ५८.२३ सेकेन्डको राष्ट्रिय किर्तिमान रहेको थियो । नासिरले उक्त किर्तिमान ११औँ एनएसए कप च्याम्पियनसिपमा राखेका थिए । नासिरले हिजो भएको ४०० मिटर फ्रिस्टायलमा पनि ४ मिनट ८.२३ सेकेन्ड समयको नयाँ राष्ट्रिय किर्तिमान कायम गरेका थिए ।

त्यस्तै, महिला तर्फको खेलमा दक्षिण एशियाली खेलकुदकी ४ स्वर्ण पदकधारी गौरिकाले पनि उपलब्धी हासिल गरेकी छन् उनले १०० मिटर ब्याक स्ट्रोकमा १ मिनट ६.८० सेकेन्ड समयमा दुरी पूरा गरिन् । अध्यक्ष अशोक बज्राचार्यका अनुसार गौरिकाको यस अघिको समय १ मिनट ७.३१ सेकेन्ड समयको रेकर्ड रहेको थियो । उनले उक्त रेकर्ड गोहाटीमा आयोजना भएको १२औँ दक्षिण एशियाली खेलकुदमा कायम गरेकी थिईन् ।

भोलि (मंगलबार) ९ गते डुवाना लामाले २०० मिटर फ्रिस्टायलमा प्रतिस्पर्धा गर्ने टोली व्यवस्थापक नरेश बैद्यले जानकारी गराएका छन् । विश्व पौडी महासंघले आफ्नो नाम फिनालाई परिवर्तन गर्दै वर्ल्ड एक्वाटिक्सको नामाकरण गरेको छ ।