पुलिसका दुवै टोली प्रधानमन्त्री कप भलिबलको फाईनलमा

विविध खेल

Home
विविध खेल
पुलिसका दुवै टोली प्रधानमन्त्री कप भलिबलको फाईनलमा

पुलिसका दुवै टोली प्रधानमन्त्री कप भलिबलको फाईनलमा

खेलकुद मञ्‍च शुक्रबार, असार २९, २०८०

काठमाडौं । नेपाल पुलिस क्लबका महिला र पुरुष दुवै टोली सातौं प्रधानमन्त्री कप एनभिए महिला तथा पुरुष राष्ट्रिय क्लब लिग भलिबल २०८० को फाईनल प्रवेश गरेका छन् ।

नेपाल भलिबल संघको आयोजनामा भएको लिगको महिला तर्फको आजको अन्तिम खेलमा पुलिसले न्यु डायमन्ड क्लबलाई ३–० को सोझो सेटमा पराजित गर्दै फाईनलको अविजित यात्रा तय गरेको हो । पुलिसले डायमन्डलाई २५–२०, २५–१४, २५–१७ ले पराजित गरेको हो । यस जितका साथ पुलिसले आफ्ना पाँचै खेल जित्दै १५ अंकका साथ पहिलो स्थान प्राप्त गर्‍यो । पुलिसले उपाधीका लागि एपिएफको सामना गर्नेछ । एपिएफ ११ अंकका साथ दोश्रो स्थानमा छ ।

आजै सम्पन्न महिलाको दोश्रो खेलमा आर्मीले गण्डकी प्रदेश माथी २५–१८, २५–१२, २५–१५ को जित हात पार्‍यो । आर्मीको ८ अंक भएको छ । त्रिपुरेश्वरस्थित कभर्डहलमा भएको लिग प्रतियोगिताको पुरुष तर्फको खेलमा जित्नै पर्ने दवावका साथ कोर्टमा उत्रेको पुलिसले एपिएफ माथी ३–० को सोझो सेटमा जित हात पार्‍यो । पुलिसले २५–२२, २५–१३, २५–१५ ले एपिएफलाई हराएको हो । यसका साथ एक खेल हारेको पुलिसको १५ अंक भएको छ । पुलिसले फाईनलमा टिपटप हेल्प नेपाल र आर्मी मध्ये एक संग उपाधीको लागि प्रतिस्पर्धा गर्नेछ ।

पुरुष तर्फकै गण्डकी प्रदेश भलिबल क्लब र दावाँली मिलन क्लबविच भएको खेलमा गण्डकीले जित हात पार्‍यो । गण्डकीले दावाँलीलाई २५–२१, २५–१५, २५–१६ ले जित हात पार्दै ३ अंक बटुल्यो । यस जितका साथ गण्डकीको ६ अंक भएको छ ।

प्रकाशित मिति: शुक्रबार, असार २९, २०८० २३:३१