काठमाडौं । इंग्लिस प्रिमियर लिग फुटबलमा वेस्टह्याम युनाइटेड र एस्टन भिल्ला विजयी हुँदा अन्य टोलीले भने बराबरी खेल्दै अंक बाँडेका छन् । शनिबार राति भएको खेलमा वेस्ट ह्यामले एभर्टनलाई २–० गोल अन्तरले पराजित गर्दा एस्टन भिल्लाले साउथह्याम्पटनलाई १–० ले हराएको हो ।
एर्भटनविरुद्ध घरेलु मैदानमा जित दर्ता गर्दा वेस्टह्यामका जोरोड ब्रोवेनले दुबै गोल गरेका थिए । खेलको ३४ औंँ मिनेटमा ब्रोवेनले गरेको गोलबाट वेस्टह्यामले सुरुआती अग्रता लिएको थियो । ४१ औँ मिनेटमा ब्रोवेनले अग्रता दोब्बर बनाएका थिए । त्यसपछि थप गोल निस्कन नसक्दा वेस्टह्यामले सहज जित निकालेको हो ।
जितपछि २० खेलबाट १८ अंक जोडेको वेस्टह्याम युनाइटेड १५ औँ स्थानमा उक्लन सफल भएको छ । लगातार खराब प्रदर्शन गर्दै आएको एभर्टन १५ अंक जोडेर रेलिगेसन जोनमा रहेको छ ।
.jpg)
प्रिमियर लिगमा गएराति सम्पन्न अर्को खेलमा एस्टन भिल्लाले साउथह्याम्पटनलाई १–० ले हरायो । एस्टन भिल्लाका लागि ओली वाटकिन्सनले ७७ औँ मिनेटमा गरेको गोल निर्णायक बन्यो । जितपछि एस्टन भिल्ला २८ अंकका साथ ११ औँ स्थानमा छ । पराजित साउथह्याम्पटन अंक तालिकाको पुछारमा रहेको छ ।
.jpg)
प्रिमियर लिग अन्तर्गत गएराति सम्पन्न अर्को खेलमा लिभरपुल र चेल्सीले गोलरहित बराबरी खेल्दै अंक बाँडेका छन् । प्रिमियर लिगमा १९ खेलबाट २९ अंक जोडेको लिभरपुल आठौं स्थानमा रहेकोछ भने २० खेलबाट २९ अंक जोडेको चेल्सी दशौं स्थानमा रहेको छ ।
यस्तै, अर्को खेलमा क्रिष्टल प्यालेस र न्युकासल युनाइटेडले गोलरहित बराबरी खेलेका छन् । जारी सिजनमा उत्कृष्ट प्रदर्शन गरिरहेको न्युक्यासल युनाइटेडले अपराजित यात्रालाई १५ खेलसम्म लम्बाएको छ । अंक बाड्नु परेपनि २० खेलबाट ३९ अंक जोडेको न्युक्यासल युनाइटेड तेस्रो स्थानमा उक्लिएको छ । क्रिष्टल प्यालेस भने २४ अंकका साथ १२ औँ स्थानमा रहेको छ ।
यसैगरी अर्को खेलमा ब्राइटन र लेस्टर सिटीले २–२ गोलको बराबरी बराबरी खेलेका छन् । बराबरीपछि ब्राइटन ३१ अंकका साथ छैटौँ स्थानमा रहेको छ । लेस्टर सिटी १८ अंकका साथ १४ औँ स्थानमा रहेको छ ।
यस्तै, अर्को खेलमा बर्नमाउथ र नटिङ्घम फरेष्टले १–१ गोलको बराबरीमा चित्त बुझाएका थिए । नटिङ्घम फरेष्ट २१ अंकका साथ १३ औँ स्थानमा छ । बर्नमाउथ १७ अंकका साथ रेलिगेशन क्षेत्रमा रहेको छ ।
-1731995984.jpg)
