काठमाडौं । कतारमा जारी २२ औँ संस्करणको फिफा विश्वकप फुटबलमा आज शुक्रबारबाट क्वाटरफाइनलका खेलहरु सुरु हुँदैछ । दुई दिनको विश्रामपछि अन्तिम आठको आज हुने पहिलो खेलमा ब्राजिलले साविक उपविजेता क्रोएसियाको सामना गर्दै छ ।
ब्राजिल र क्रोएसियाबीच हुने खेल एजुकेसन सिटी रंगशालामा नेपाली समयअनुसार राति ८:४५ बजेदेखि सुरु हुनेछ । कतार विश्वकपमा अपराजित रहँदै क्रोएसिया क्वाटरफाइनल पुगेको हो भने ब्राजिल एक खेल पराजित भइसकेको छ । ब्राजिलले अन्तिम–१६ को खेलमा दक्षिण कोरियाको चुनौती ४–१ ले पन्छाएको थियो । यता, क्रोएसियाले भने जापानलाई पेनाल्टी सुटआउटमा ३–१ ले हराएको थियो । दुई टोलीबीच हालसम्म ४ पटक प्रतिस्पर्धा भएको छ जसमा ब्राजिलले तीन खेलमा जितेको छ भने एक खेल बराबरीमा सकिएको छ ।
क्रोएसिया फिफा वरीयतामा १२ औं स्थानमा छ । चार वर्ष अघि रुसमा भएको विश्वकपमा उत्कृष्ट प्रदर्शन गर्दै क्रोएसिया फाइनल पुगेको थियो । तर फ्रान्ससँग पराजित हुँदै उपविजेता बन्यो । क्रोएसिया पूर्णतः लुका मोड्रिचमा केन्द्रित छ ।
.jpg)
फिफा वरीयतामा विश्व नम्बर एक अनि विश्वकपको सदाबहार दाबेदार रहेपनि ब्राजिलले २००२ पछि उपाधि जित्न भने सकेको छैन । ब्राजिल टिममा नेयमर चोटमुक्त हुँदै फर्केपछि उत्साहित रहनेछ । तर प्रशिक्षक टिटेले फुलब्याक एलेकस टेल्सलाई भने चोटकै कारण गुमाइसकेका छन्, यो टिमका लागि धक्का हो ।
पछिल्लो पटक एसियामै भएको विश्वकप जितेको ब्राजिल दोस्रो पटक एसियामा विश्वकप हुँदा उपाधिको पर्खाइलाई अन्त्य गर्न चाहन्छ । चार वर्ष अघि रुसमा क्वाटरफाइनल पुगे पनि बेल्जियमसँग पराजित हुँदै ब्राजिल घर फर्केको थियो ।
आजै हुने दोस्रो क्वार्टरफाइनल खेलमा अर्जेन्टिनाले नेदरल्यान्ड्सविरुद्ध खेल्दै छ । कतारको लुसैल रंगशालमा हुने यो खेल राति १२:४५ बजेदेखि सुरु हुनेछ । अर्जेन्टिनाले अन्तिम–१६ को खेलमा अस्ट्रेलियालाई २–१ ले पराजित गरेको थियो । यस्तै, नेदरल्यान्ड्सले भने अमेरिकालाई ३–१ ले पराजित गरेको थियो ।
अर्जेन्टिना फिफा वरीयतामा तेस्रो स्थानमा छ । नेदरल्याण्ड्स फिफा वरीयतामा ८ औं स्थानमा छ । अर्जेन्टिना सन् १९७८ को फाइनलमा नेदरल्यान्ड्सलाई हराएर पहिलोपल्ट विश्वकप फुटबलमा च्याम्पियन भएको थियो । त्यसको दुई दशकपछि अर्जेन्टिनालाई हराएर नेदरल्यान्ड्स सेमिफाइनल पुगेको थियो ।
सन् २०१४ मा ब्राजिलमा भएको विश्वकपमा सेमिफाइनलसम्म पुगेको नेदरल्याण्ड्स अर्जेन्टिनासँग पराजित भएको थियो । तीन पटकसम्म विश्वकपको फाइनल पुगेर पनि उपाधि जित्न नसकेको नेदरल्याण्ड्स ८ वर्षपछि विश्वकपमा फर्कंदै क्वाटरफाइनल पुगेको हो । दुई टोलीबीच अहिलेसम्म ९ खेलमा प्रतिस्पर्धा भएको छ जसमा ४ खेलमा नेदरल्यान्ड्सले जितेको छ भने तीन खेल अर्जेन्टिनाले जित्दा २ खेल बराबरीमा सकिएको छ ।
.jpg)
अर्जेन्टिना पनि ८ वर्षपछि क्वाटरफाइनल खेल्दैछ । आठ वर्षअघि सेमिफाइनलमा बेहोरेको हारको बदला लिने दाउमा छन् भान गाल । यसपालि पनि उनको मुख्य चुनौती मेसी नै हुन् । लिओनल मेसीको सम्भावित अन्तिम विश्वकपको रुपमा रहेको यस संस्करणमा अर्जेन्टिना च्याम्पियन बन्दै ३६ वर्षको विश्वकप उपाधि खडेरी तोड्ने लक्ष्यमा छ ।
-1731995984.jpg)
