काठमाडौं, साउन ३ । राष्ट्रिय खेलकुद परिषद् (राखेप)का नवनियुक्त सदस्य–सचिव रमेशकुमार सिलवालले नेपालमा हुने १३औँ दक्षिण एसियाली खेलकुद (साग) पहिलो चुनौती भएको बताएका छन् । नेपाल राष्ट्रिय तथा अन्तर्राष्ट्रिय खेलाडी संघले बिहिबार सदस्य–सचिव सिलवालकै सम्मानमा आयोजना गरेको स्वागत कार्यक्रम उनले यस्तो बताएका हुन् ।
सदस्य सचिव सिलवालले साग गेमका लागि निर्माण कार्यमा संलग्न प्रत्येकलाई समयमा काम सम्पन्न गर्न लिखित प्रतिबद्धता पत्र मागेको समेत जनाएका छन् । त्यसैगरी, उनले खेलक्षेत्रका विषयमा कुरा गर्न मागपत्र बुझाउनु भन्दा आफूलाई भेटेर कुरा गर्न सुझाएका छन् । ‘तपाईंहरुलाई केहि चाहियो भने बुवा/आमालाई पक्कै पनि माग पत्र दिनु हुन्न होला । कुरा गर्न हुन्छ होला । म पनि खेलकुदको अभिभावक हुँ । केहि समस्या छ भने भेट्न आउनुस, बसेर कुरा गरौला र हल निकालौला । माग पत्र दिइ रहनु पर्दैन ।’– सदस्य–सचिव सिलवालले भने ।
कार्यक्रममा खेलाडी संघका अध्यक्ष दीपक श्रेष्ठ, मानार्थ अध्यक्ष दीपक बिष्टलगायतले सदस्य–सचिव सिलवाललाई पुष्पगुच्छा, माला र खादा प्रदान गरी स्वागत गर्नुका साथै कार्यकाल पूर्ण सफलताका लागि शुभकामना दिएका थिए । सो अवसरमा खेलाडी संघका अध्यक्ष श्रेष्ठले सदस्य–सचिव सिलवाललाई सुझावसहितको १३ बुँदे ध्यानाकर्षण पत्र बुझाएका थिए ।
ध्यानाकर्षण पत्रमा बृहत राष्ट्रिय खेलकुदका स्वर्ण विजेतालाई मात्र नगद पुरस्कार दिदैं आएकोमा रजत र कांस्यलाई पनि नगद पुरस्कारको व्यवस्था गर्नु पर्ने, सागको तयारीलाई तीब्र गतिमा अगाडि बढाउनु पर्ने, सागको छनौटको आधार स्पष्ट हुनु पर्ने, पदक विजेता खेलाडीको वर्गिकरण गरी सामाजिक सुरक्षाको व्यवस्था गर्नु पर्ने, नयाँ पुस्ताका खेलाडीलाई आकर्षित गर्न सरकारले नीति ल्याउनु पर्ने, स्थानीयदेखि अन्तर्राष्ट्रियस्तरका खेलाडीको पहिचान खुल्ने गरी परिचय पत्रको व्यवस्था गर्नुका साथै त्यसैका आधारमा सरकारले निश्चित सहुलियतका पहल गर्नु पर्ने र खेलाडीलाई पलायन हुनबाट जोगाउन नीतिगत पहल गर्नु पर्ने उल्लेख छ ।
त्यस्तै, सागका स्वर्णधारी, एसियाडका पदकधारी र ओलम्पियनहरुलाई दिइदै आएको आजीवन भत्तालाई निरन्तरता दिदैं सागका रजत र कांस्य विजेतालाई पनि भत्ताको व्यवस्था गर्नु पर्ने, देशका लागि योगदान पुर्याएका खेलाडीहरुको मापन गरी प्रतियोगितापश्चात पनि खेलाडीको बीमा गर्नु पर्ने, सागमा तीन वा सो भन्दा बढी स्वर्ण जित्ने खेलाडीलाई सरकारले नगद पुरस्कारबाट सम्मान गरिसकेकोमा तीन भन्दा कम स्वर्ण जित्ने खेलाडीलाई पनि नगद पुरस्कारको व्यवस्था हुनु पर्ने, राजनीतिक आस्थाका आधारमा खेलाडी माथि हुने विभेदको पूर्ण रुपमा अन्त्य हुनु पर्ने तथा राष्ट्रिय खेलाडी कल्याण कोषमा केहि वर्षदेखि रकम थप गर्ने कार्य रोकिएको हुँदा हरेक वर्ष २० लाखका दरले कोषमा रकम थप गर्ने प्रक्रिया अगाडि बढाउनु पर्ने भनिएको छ ।
अध्यक्ष श्रेष्ठ र मानार्थ अध्यक्ष बिष्टले सदस्य–सचिव सिलवालको कार्यकाल सुनौलो हुने विश्वास व्यक्त गर्दै सदस्य–सचिव सिलवालको शैक्षिक संस्थाले खेलकुद र खेलाडीको विकासमा उल्लेखनीय कार्य गरेको बताए ।
-1731995984.jpg)
