अबदेखि बीमा बिनाको प्रतियोगिता हुँदैन : सदस्य सचिव सिलवाल

राखेप/एनओसी

Home
राखेप/एनओसी
अबदेखि बीमा बिनाको प्रतियोगिता हुँदैन : सदस्य सचिव सिलवाल

2076-03-27 अबदेखि बीमा बिनाको प्रतियोगिता हुँदैन : सदस्य सचिव सिलवाल

खेलकुद मञ्‍च शुक्रबार, असार २७, २०७६

काठमाडौं, असार २७ । राष्ट्रिय खेलकुद परिषद् (राखेप)का सदस्य–सचिव रमेशकुमार सिलवालले अबदेखि बीमा बिनाको प्रतियोगिता नहुने बताएका छन् । राखेप कर्मचारी संघले बिहिबार आयोजना गरेको राखेपका नवनियुक्त सदस्य–सचिव सिलवालको स्वागत तथा राखेपका निवर्तमान सदस्य–सचिव केशवकुमार बिष्टको बिदाइ कार्यक्रममा सदस्य–सचिव सिलवालले यस्तो बताएका हुन् ।

‘खेलाडी, प्रशिक्षक, अफिसियलको बीमा नगरिएको प्रतियोगिता मान्य हुँदैन । चाहे त्यो राष्ट्रिय प्रतियोगिता होस् वा अन्य प्रतियोगिता । बीमा गर्नै पर्छ’, सदस्य–सचिव सिलवालले भने । उनले खेलकुदलाई विवादको थलो बनाउन खोज्ने कुतत्वलाई सबै मिलेर सामाजिक बाहिष्कार गर्नु पर्ने धारणा व्यक्त गर्दै विगतमा भएका राम्रा कामलाई निरन्तरता दिने समेत बताए ।

उनले बाहिरबाट हायर गरिएको व्यक्तिले नभइ परिषद्कै कर्मचारी स्वयंले आफ्नो संस्थालाई मजबुत बनाउनु पर्ने बताउदै आफ्नो कार्यकाल पारदर्शी, परिणाममुखी, स्वच्छ र अनुशासित हुने बताए । ‘यहाँ धेरै कर्मचारीहरु लामो समय काम गरेका छन् । हायर गरेको व्यक्तिले होइन तपाईंहरुले नै परिषद्लाई मजबुत बनाउने हो’ सदस्य–सचिव सिलवालले भने, ‘मेरो कार्यकाल यस्तो हुन्छ भनेर भन्दिन । तर मेरो कार्यकाल पारदर्शी, परिणाममुखी, स्वच्छ, अनुशासित हुन्छ ।’

त्यसैगरी, राखेपका उपाध्यक्ष पिताम्बर तिम्सिनाले आफ्नो सिंगो अनुभव खेलकुदको विकासमा प्रयोग गरेको बताउदै वर्तमान सदस्य–सचिवलाई खेलकुदको हितका निम्ति पूर्ण सहयोग गर्ने प्रतिबद्धता जनाए । निवर्तमान सदस्य–सचिव बिष्टले १३औँ दक्षिण एसियाली खेलकुद (साग) राष्ट्रकै प्रतिष्ठासंग जोडिएको विषय भएकाले समयमै हुनु पर्नेमा जोड दिएका थिए ।

नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठले खेलकुदलाई माया गर्ने र खेलकुद बुझेको व्यक्तिलाई सदस्य–सचिव बनाएर पठाएकोमा नेपाल सरकारलाई धन्यवाद दिए । उनले निवर्तमान सदस्य–सचिव बिष्टको कार्यकालमा पनि धेरै राम्रा कामहरु भएको बताए ।

राखेप कर्मचारी संघका अध्यक्ष रञ्जन थापाले लामो समयदेखि रोकिएको कर्मचारीहरुको बढुवाका लागि वर्तमान सदस्य–सचिवलाई पहल गरिदिन आग्रह गर्दै करार कर्मचारीहरुलाई स्थायी गर्ने विषयमा पनि गम्भीर हुन आवश्यक रहेको बताए ।

कार्यक्रममा कर्मचारी संघले निवर्तमान सदस्य–सचिव बिष्टलाई खेलकुदको विकास र विस्तारमा योगदान पुर्याएवापत प्रशंसापत्र प्रदान गरी सम्मान गरेको थियो ।

प्रकाशित मिति: शुक्रबार, असार २७, २०७६ ०८:०७