काठमाडौं । जैशिदेवल युथ क्लबले आफ्नो ३२औं वार्षिक उत्सवको अवसरमा शनिबार छैठौं ईन्ट्रा डोजाङ्ग तेक्वान्दो प्रतियोगिता २०८२ सम्पन्न गरेको छ । काठमाडौं महानगरपालिका वडा नम्बर २१ को आर्थिक सहयोगमा आयोजना गरिएको एक दिने प्रतियोगितामा विभिन्न समुहका ८८ जना खेलाडीहरूले २३ स्वर्ण, २३ रजत र ४६ काँस्यका लागि प्रतिस्पर्धा गरेका थिए ।
प्रतियोगिताको उद्घाटन कार्यक्रममा बागमती प्रदेशकी युवा तथा खेलकुद मन्त्री उर्मिला नेपाल के.सी., सभापति एवं जैशिदेवल युथ क्लबका अध्यक्ष राजेश प्रजापति तथा नेपाली काँग्रेसका केन्द्रीय सदस्य एवं पूर्व सांसद ध्यान गोविन्द रन्जितलगायत विशिष्ट अतिथिहरूको उपस्थितिमा खेलाडीहरुलाई पदक र प्रमाण–पत्र वितरण गरिएको थियो ।
सो अवसरमा प्रदेश सभा सदस्य एवं अर्थ तथा विकास समिति सभापति नुरज बज्राचार्य, काठमाडौँ जिल्ला समन्वय समितिका अध्यक्ष सन्तोष बुढाथोकी, काठमाडौँ महानगरपालिका प्रवक्ता तथा वडा नम्बर १७ का अध्यक्ष नविन मानन्धर, प्रदेश विकास खेलकुद परिषदका सदस्य-सचिव दिपक लामा, काठमाडौं महानगरपालिका वडा नम्बर २१ का अध्यक्ष उदय चुडामणि बज्राचार्य, वडा नम्बर १२ का अध्यक्ष बालकृष्ण महर्जन, वडा नं.१९ का अध्यक्ष राजेश श्रेष्ठ, वडा नम्बर २० का अध्यक्ष राजेन्द्र मानन्धर, वडा नम्बर २४ का अध्यक्ष विनोद राज राजभण्डारी, वडा नम्बर १४ का अध्यक्ष सुमन श्रेष्ठ, नेपाल तेक्वान्दो संघ बागमती प्रदेशका अध्यक्ष केशव पुरीलगायतको समेत सहभागिता रहेको थियो ।
यसै क्रममा काठमाडौँ महानगरपालिका वडा नम्बर १२ ले जैशिदेवल तेक्वान्दो डोजाङ्गलाई दैनिक अभ्यासका लागि दुई लाख रुपैयाँ बराबरको खेल सामग्री प्रदान गरेको छ । उक्त सामग्री वडा अध्यक्ष बालकृष्ण महर्जनले क्लब अध्यक्ष प्रजापतिलाई हस्तान्तरण गरेका हुन् । साथै, नेपाल तेक्वान्दो संघको वार्षिक कार्यक्रम तालिका अनुसार सम्पन्न सिनियर ग्रेडिङ्ग परीक्षामा ब्ल्याक बेल्ट पहिलो डान प्राप्त गर्न सफल पाँच खेलाडीलाई मन्त्री के.सी.ले प्रमाणपत्र तथा बेल्ट वितरण गरेकी थिइन् ।
जैशिदेवल युथ क्लबले प्रतियोगिताको माध्यमबाट नेपाली तेक्वान्दोमा उत्कृष्ट खेलाडी उत्पादन गर्ने उद्देश्य राखेको जनाएको छ ।विगतका यस्तै प्रतियोगिताबाट यस क्लब अन्तर्गतको डोजाङ्गका धेरै खेलाडीले राष्ट्रिय तथा अन्तर्राष्ट्रियस्तरमा नेपालका लागि पदक जितिसकेको तथ्य स्मरणीय रहेको छ । क्लबले आफ्नै खर्चमा खेलाडीलाई विभिन्न प्रतियोगितामा सहभागी गराउँदै आएको र यो निरन्तरता आगामी दिनमा पनि रहने अध्यक्ष प्रजापतिले बताए ।
-1756634589.jpeg)
