काठमाडौं । राजधानीमा जारी पहिलो संस्करणको फ्रेन्चाइज क्रिकेट प्रतियोगिता नेपाल टी–२० लिगमा विराटनगर सुपर किंग्स दोस्रो क्वालिफायरमा प्रवेश गरेको छ । कीर्तिपुरस्थित टियु क्रिकेट मैदानमा सोमबार भएको खेलमा विराटनगरले काठमाडौं नाईट्सलाई ९९ रनले हराउँदै दोस्रो क्वालिफायरमा स्थान बनाएको हो ।
विराटनगरले दिएको १८३ रनको लक्ष्य पछ्याउने क्रममा काठमाडौं १२.४ ओभरमा ८३ रनमै अलआउट भयो । काठमाडौंका लागि अविनाश बोहराले अविजित १६, कप्तान ज्ञानेन्द्र मल्लले १५, लोकेश बमले १३ र कमल ऐरीले ११ रन बनाए । अन्य ब्याटरले दोहोरो अंकमा रन जोड्न सकेनन् ।
काठमाडौंलाई सस्तैमा समेट्ने क्रममा विराटनगरका सूर्य तामाङले शानदार बलिङ गरे । तामाङले २.४ ओभरमा १४ रन दिएर ४ विकेट लिए । साहब आलम र केओन जोसेफले समान २/२ विकेट लिएका थिए । त्यस्तै, हुसेन तालतले एक विकेट लिए ।
.jpg)
यसअघि, टस जितेर ब्याटिङमा आएको विराटनगरले निर्धारित २० ओभरमा ६ विकेट गुमाएर १८२ रनको योगफल खडा गरेको थियो । विराटनगरका लागि कप्तान रोहितकुमार पौडेलले ४९ बलमा ६ चौका र २ छक्काको सहयोगमा ६१ रनको अर्धशतकीय पारी खेल्दै आउट भएका थिए ।
रोहितको यो नेपाल टि-२० लिगमा चौथो अर्धशतक हो । योसँगै रोहित जारी लिगमा सर्वाधिक रन बनाउने ब्याटरमा दोस्रो स्थानमा उक्लिएका छन् । रोहितले ११ खेलमा ३ सय ४७ रन बनाउँदा फार वेस्टका युनाइटेडका हश्मातुल्लाह शाहिदी ४ सय रनका साथ शीर्ष स्थानमा छन् ।
त्यस्तै, युवा अलराउन्डर विवेककुमार यादवले आक्रामक पारी खेले । १८ बलको सामना गरेका उनले ३ छक्का र ३ चौकाको मद्दतमा अविजित ४६ रन बनाएका थिए । हुसेन तलतले ३८ र राज नाननले २३ रन जोडे । काठमाडौंका लागि कमलसिंह ऐरी र अनिल खरेलले समान २/२ विकेट लिदा अविनाश बोहरा र गौतम केसीले समान १/१ विकेट लिए ।
जीतसंगै विराटनगरले फाइनल प्रवेशका लागि दोस्रो क्वालिफायरमा जनकपुर रोयल्सविरुद्ध भोलि मंगलबार प्रतिस्पर्धा गर्ने भएको छ । लिगको पहिलो क्वालिफायरमा जनकपुरलाई ६ रनले पराजित गर्दै लुम्बिनी अल स्टार फाइनलमा प्रवेश गरिसकेको छ । विराटनगरबाट उत्कृष्ट प्रदर्शन गरेका कप्तान रोहितकुमार पौडेल ‘प्लेयर अफ द म्याच’ भए ।
.jpg)
प्रतियोगितामा विजेता टिमले नगद ५५ लाख रुपैयाँ पुरस्कार प्राप्त गर्दा दोस्रो हुने टिमले ३० लाख नगद प्राप्त गर्ने छ । यसैगरी तेस्रो हुने टिमलाई नगद १० लाख रुपैयाँ पुरस्कार दिइने छ भने चौथो हुने टिमले पनि नगद ५ लाख प्राप्त गर्ने छ । प्लयेर अफ दी सिरिजलाई नगद ५ लाख प्रदान गर्दा वेस्ट बलर र बेस्ट ब्याटरले समान २ लाख ५० हजार प्राप्त गर्ने छन् । इमर्जिङ प्लेयरले नगद १ लाख ८० हजार पाउने छन् । पहिलो संस्करणको लिगमा ६ टोलीको सहभागिता रहेको छ ।
