यू–१९ क्रिकेट : बागमतीको चौथो जित, पराजित कर्णाली बाहिरियो

राखेप/एनओसी

Home
राखेप/एनओसी
यू–१९ क्रिकेट : बागमतीको चौथो जित, पराजित कर्णाली बाहिरियो

यू–१९ क्रिकेट : बागमतीको चौथो जित, पराजित कर्णाली बाहिरियो

खेलकुद मञ्‍च 2079-8-13

काठमाडौं । वाई वाई यू-१९ राष्ट्रिय क्रिकेट प्रतियोगितामा बागमतीले लगातार चौथो जित हात पारेको छ । टियु क्रिकेट मैदानमा मंगलबार भएको खेलमा बागमतीले कर्णाली प्रदेशलाई ७ विकेटले पराजित गरेको हो ।

कर्णालीले दिएको १३१ रनको लक्ष्य बागमतीले ३०.१ ओभरमा ३ विकेट गुमाएर पूरा गरेको छ । बागमतीका लागि कप्तान अशोक पौडेलले सर्वाधिक ५९ रनको अर्धशतकीय पारी खेले । उनले ६४ बल खेल्दै ७ चौका र १ छक्का प्रहार गरे । ओपनर लक्की कठायत ५१ रनमा अविजित रहे । उनले ९२ बलमा ८ चौका प्रहार गरे । बलिङमा कर्णालीका लागि अनुज चौहान, युनिस सिंह र आभास शाहीले समान १–१ विकेट लिए ।

त्यसअघि टस जितेर ब्याटिङ गरेको कर्णालीले ३६.२ ओभरमा सबै विकेट गुमाएर १३० रनको योगफल तयार पारेको थियो । कर्णालीका लागि ओपनर ब्याटर विपिन रावलले ६८ रनको अर्धशतकीय पारी खेले । उनले ९२ बल खेल्दै ९ चौका प्रहार गरे । अर्का ओपनर मनिष थापाले ३५ बलमा ४ चौकाको मद्धतमा २५ रन बनाए । अनिरोध कुँवरले ११ रन बनाए ।

बागमतीका लागि सक्रिय कार्कीले सर्वाधिक पाँच विकेट लिए । अहमद राजाले ३ विकेट लिए भने, ओमकार यादव र अभिषेक कोइरालाले समान १–१ विकेट लिए । चार खेलमा अपराजित बागमती ८ अंक सहित तालिकाको दोस्रो स्थानमा छ भने कर्णाली समान चार खेलमा १ जित र ३ हार सहित कर्णाली प्रतियोगिताबाट बाहिरिएको छ ।

सिंगल राउण्ड रोबिन अन्तर्गत भएको प्रतियोगितामा अंक तालिकाका शीर्ष २ टिमले फाइनल खेल्नेछन् । मंसिर १९ गते सम्म सञ्चालन हुने प्रतियोगिताको विजेताले २ लाख नगद प्राप्त गर्दा उपविजेताले १ लाख नगद पाउनेछ । यस्तै प्लेयर अफ द सिरिज बन्ने खेलाडीले १५ हजार तथा उत्कृष्ट बलर र ब्याट्सम्यानले १०/१० हजार पाउने छन् ।

प्रकाशित मिति: मंगलबार, मंसिर १३, २०७९ १६:११