महिला साफ : भारतविरुद्ध ऐतिहासिक जित निकाल्दै नेपाल फाइनलमा

विविध खेल

Home
विविध खेल
महिला साफ : भारतविरुद्ध ऐतिहासिक जित निकाल्दै नेपाल फाइनलमा

महिला साफ : भारतविरुद्ध ऐतिहासिक जित निकाल्दै नेपाल फाइनलमा

खेलकुद मञ्‍च 2079-5-31

काठमाडौं । भारतविरुद्ध ऐतिहासिक जित निकाल्दै नेपाल छैटौं संस्करणको महिला साफ च्याम्पियनसिप फुटबलको फाइनल प्रवेश गरेको छ । त्रिपुरेश्वरस्थित दशरथ रंगशालामा भएको खेलमा भारतलाई १-० गोल अन्तरले हराउँदै नेपाल फाइनलमा पुगेको हो ।

खेलको पहिलो हाफको इन्जुरी समयमा नेपालकी फरवार्ड रश्मीकुमारी घिसिङले प्रिती राईको क्रसलाई पेनाल्टी क्षेत्रबाट आत्मविश्वासका साथ हानेको प्रहारलाई भारतकी गोलकिपर आदिती चौहानले बचाउन सकिनन् । नेपाललाई जित दिलाउन रश्मी कुमारी घिसिङको गोल नै निर्णायक बन्यो ।

नेपालले दोस्रो हाफमा पनि गोलका केही राम्रा अवसर सिर्जना गरेको थियो । तर, त्यसलाई सदुपयोग गर्न भने सकेन । ६३औँ मिनेटमा प्रिति राईले पेनाल्टी क्षेत्रबाटै हानेको प्रहार थोरैले बाहिरिँदा नेपाल अग्रता बढाउनबाट चुक्यो । भारतले गोल फर्काउने थुप्रै प्रयास गरे पनि नेपाली खेलाडीले सवै प्रयास विफल पारेका थिए ।

यससँगै दक्षिण एसियाली महिला फुटबलमा भारतको दबदबा तोडिएको छ । नेपालले साफ इतिहासमा भारतमाथि पहिलो जित निकालेकाे हाे । नेपाल पाँचौँ पटक फाइनलमा पुग्दा भारत भने पहिलो पटक फाइनल पुग्न सकेन ।

नेपाली टोलीले रंगशालामा उपस्थित ८ हजार दर्शकलाई निराश पारेन । खुसी बनाएर घर पठायो । अब नेपालले बंगलादेशसँग उपाधिका लागि सोमबार खेल्ने छ । आजै भएकाे पहिलाे सेमिफाइनलमा भुटानलाई ८–० गाेलले हराउँदै बङ्ग्लादेश फाइनलमा पुगेकाे हाे ।