काठमाडौं, असार ७ । ‘ओलम्पिक डे २०२१’को अवसरमा आयोजित भर्चुअल चित्रकला प्रतियोगितामा भिएस निकेतन, मिनभवन स्कुलकी कक्षा ८ मा अध्ययनरत अदिती के.सी.ले पहिलो स्थान हात पारेकी छन् । ओलम्पिक डेको अवसरमा भिएस निकेतनले आफ्ना विद्यार्थीहरुका लागि नेचर, ग्लोबल वार्मिङ्ग र फ्युचर बिषयमा भर्चुअल चित्रकला प्रतियोगिताको आयोजना गरेको थियो ।
प्रतियोगितामा दुई सय ५० विद्यार्थीहरुको सहभागिता रहेको थियो । प्रतियोगितामा बर्षदा धिताल दोश्रो र आर्य प्रधान तेश्रो भएका थिए ।
क्विज कन्टेष्ट :
संस्कार पाठशाला दाङ्ग, तुलसीपुरले ओलम्पिक डेको अवसरमा क्विज कन्टेष्टको आयोजना गरेको थियो । ८ विद्यार्थीबीच भएको प्रतियोगितामा न्यूसन खनाल प्रथम, बिमल ओली दोश्रो र स्वर्णिम पोखरेल तेश्रो भएका थिए ।
वृक्षारोपण :
ओलम्पिक डेकै अवसरमा सुदूरपश्चिम प्रदेशमा रहेका ओलम्पियन, खेलाडी, खेल प्रशिक्षक र खेलकुदकर्मीहरुले ओलम्पिकलाई वातावरणसँग जोड्दै वृक्षारोपणको आयोजना गरेका छन् ।
वक्तृत्वकला प्रतियोगिता :
कर्णाली प्रदेश खेलकुद विकास परिषदले ‘ओलम्पिक डे’का अवसरमा ‘स्वास्थ्यको लागि खेलकुद, राष्ट्रको लागि खेलकुद, कर्णालीको ओलम्पिक लक्ष पूर्वतयारीले जितिन्छ अवश्य’ भन्ने बिषयमा प्रदेशस्तरीय वक्तृत्वकला प्रतियोगिताको आयोजना गरेको छ । तीन दिनसम्म संचालन हुने प्रतियोगिता कक्षा ८ देखि १२ कक्षासम्मका ५४ विद्यार्थीहरुको सहभागिता रहेको छ ।
प्रतियोगिताको समापन ओलम्पिक डेको अवसरमा पुरस्कार वितरणसहित गरिने छ । कार्यक्रमको उद्घाटन कर्णाली प्रदेश खेलकुद विकास परिषद्का सदस्य सचिव बिश्वामित्र सञ्जेलले गरेका थिए । त्यस्तै, सुदूरपश्चिम खेलकुद परिषद्का सदस्य सचिव दीपक सिंह, बागमती खेलकुद परिषद्का सदस्य सचिव सूर्य भण्डारी, ओलम्पिन डम्बरदत्त भट्ट, हरि रोक्का, ओलम्पिक डेका संयोजक स्पोर्टस् फर अलका अध्यक्ष कृष्ण गोपाल श्रेष्ठलगायतको उपस्थिती रहेको थियो ।
प्रतियोगितामा विजयी पहिलो, दोश्रो र तेश्रोले नगद १०, ८ र ५ हजार प्राप्त गर्ने छन् भने सान्त्वना प्राप्त गर्ने प्रतियोगिले नगद ३ हजार प्राप्त गर्ने छन् । पुरस्कार रकम कर्णाली प्रदेश खेलकुद विकास परिषद्ले प्रायोजन गरेको थियो ।
-1731995984.jpg)
