काठमाडौं, माघ ५ । बौद्धनाथ डेभलपमेन्ट कमिटी र बुद्ध तामाङ कल्याण गुठीको आयोजनामा प्रथम चक्र लामा/किसन लामा स्मृति राष्ट्रव्यापी स्कुनर प्रतियोगिता माघ २८ गतदेखि हुने भएको छ । नेपाली स्नुकरमा खेलाडी सहभागिताको संख्या र नगद पुरस्कारका हिसाबले यो अहिलेसम्मकै ठूलो प्रतियोगिता भएको आइतबार आयोजित पत्रकार सम्मेलनमा प्रतियोगिता संयोजक राजन लामाले जानकारी गराए ।
प्रतियोगितामा विभिन्न ५० जिल्लाबाट दुई सय ५६ खेलाडीको सहभागिता रहने छन् । प्रतियोगितामा सर्वाधिक एक सय ४७ अंक ब्रेक गर्नेलाई १० लाख नगद पुरस्कार प्रदान गरिने छ । सेन्चुरी ब्रेककर्तालाई दुई लाख एक हजार तथा सर्वाधिक ब्रेककर्तालाई २१ हजार पाँच सय नगद पुरस्कार दिइने छ । उत्कृष्ट खेलाडीले ११ हजार पाँच सय नगद पुरस्कार प्राप्त गर्ने छन् ।
विजेताले दुई लाख ११ हजार पाँच सय तथा उपविजेताले ९० हजार नगद पुरस्कार पाउने छन् । तेश्रो हुने दुई खेलाडीले ३० हजार तथा क्वाटरफाइनलिस्ट चार जनालाई जनही १० हजार पाँच सय नगदबाट पुरस्कृत गरिने छ । प्रिक्वाटर फाइनलिस्टलाई गिफ्ट ह्याम्पर स्वरुप किउ र किउ बक्स प्रदान गरिने छ ।
त्यस्तै, उदीयमान खेलाडी तथा अनुशासित खेलाडीलाई ११ हजार पाँच सय नगद पुरस्कार प्रदान गरिने छ । प्रतियोगिता सञ्चालन गर्न करिब ३२ लाख पाँच सय खर्च हुने संयोजक लामाले बताए । प्रतियोगितामा नेपाल बिलियर्ड, स्नुकर तथा पुल संघको प्राविधिक सहयोग रहने संघका अध्यक्ष समेत रहेका चार पटकका स्नुकर राष्ट्रिय च्याम्पियन सरोजकुमार मुल्मीले जानकारी दिए ।
प्रिक्वाटरफाइनल बेस्ट अफ नाइन, क्वाटरफाइनल बेस्ट अफ ११, सेमिफाइनल बेस्ट अफ १३ र फाइनल बेस्ट अफ १५ का आधारमा खेलाइने छ । त्यसअघिका खेलहरु बेस्ट अफ पाँचका आधारमा हुने छ । प्रतियोगिताबाट खेलाडीको वरियता पनि निर्धारण गरिने अध्यक्ष मुल्मीले बताए । फागुन २२ गतेसम्म चल्ने प्रतियोगिताका खेलहरु बौद्धस्थित अजिमा स्नुकर हाउसमा खेलाइने छ । चक्र स्नुकरका पूर्व च्याम्पियन तथा किसन स्नुकर प्रेमीका साथै र स्नुकरका सहयोगी थिए ।
-1731995984.jpg)
