क्रिकेटर सन्दीप करोडौंमा जमैका तलावाजमा आवद्ध

राखेप/एनओसी

Home
राखेप/एनओसी
क्रिकेटर सन्दीप करोडौंमा जमैका तलावाजमा आवद्ध

क्रिकेटर सन्दीप करोडौंमा जमैका तलावाजमा आवद्ध

खेलकुद मञ्‍च 2077-03-23

काठमाडौं, असार २३ । क्यारेबियन प्रिमियर लिग (सिपिएल) सिजन २०२० को खेलाडी ड्राफ्टमा नेपालका युवा लेग स्पिनर सन्दीप लामिछानेलाई जमैका तलावाजले अनुबन्ध गरेको छ । जमैका तलावाजले सोमबार भएको ड्राफ्टबाट सन्दीपलाई अनुबन्ध गरेको हो । आफ्नो न्यूनतम मूल्य ९० हजार डलर (एक करोड सात लाख रुपैयाँ बढी) मूल्य तोकेका सन्दीप दोस्रो राउन्डमै छनोटमा परेका हुन् ।

सन्दीपले ड्राफ्टका लागि ९० हजार अमेरिकी डलर मूल्य राखेका थिए । गत असार १० गते गरिएको ड्राफ्ट सोमबार साँझ सार्वजनिक गरिएको हो । सन्दीप आबद्ध टिममा आन्द्रे रसेल, कार्लोस बाथवेटलगायतका खेलाडी छन् । ड्राफ्टका लागि २३ देशका पाँच सय ३७ खेलाडीले नाम दर्ता गराएकोमा सन्दीप चौथो महँगो मूल्य राख्ने खेलाडी मध्येमा थिए । सन्दीपले यसअघि दुई पटक सीपीएल खेलिसकेका छन् । सन्दीपले यस अघि सेन्ट किट्स एन्ड नाभिस प्याट्रियट्स र बार्बाडोस ट्राइडेन्ट्सबाट खेलेका थिए ।

यो सीपीएलमा सन्दीपको अहिलेसम्म कै सर्वाधिक महँगो मूल्य हो । सन्दीपलाई यस अघि सेन्ट किट्सले पाँच हजार अमेरिकी डलर र बार्बाडोसले ७० हजार अमेरिकी डलरमा अनुबन्धन गरेको थियो ।

कोरोना भाईरसको महामारीको कारण यस सिजनको सीपीएलको मिति तय भएको छैन । तर, आगामी अगष्ट १८ देखि सेप्टेम्बर १० सम्म ट्रीनिडाड एन्ड टोबेगोमा बन्द रंगशालामा प्रतियोगिता गर्ने प्रस्ताव गरिएको छ । तर ट्रिनिडाडको सरकारले प्रतियोगिताका लागि अनुमति दिन बाँकी नै छ ।

प्रकाशित मिति: मंगलबार, असार २३, २०७७ ०९:०७