काठमाडौं, जेठ २ । विश्वव्यापी महामारीको रुप लिएको कोरोना भाइरस (कोभिड १९)को नियन्त्रण र रोकथाम गर्न लागू गरिएको लकडाउनका कारण प्रत्यक्ष मारमा परेकाहरुको सहयोगमा राष्ट्रिय खेलकुद परिषद्का सदस्य एकेन्द्र कुँवर जुटेका छन् । लकडाउन लागू भएपछि नै दैनिक ज्यालादारी गरी गुजारा चलाउँदै आएका मजदुर, आर्थिक अवस्था कमजोर भएका, विपन्न वर्गका परिवारलगायतलाई निजी खर्चमा राहतस्वरुप खाद्यान्न वितरण गर्ने कार्यमा सदस्य कुँवर जुटेका हुन् । बिहिबार सदस्य कुँवरले काठमाडौं उपत्यकाका विभिन्न स्थानमा एक सय १० परिवारलाई राहत वितरण थिए ।
कुँवरले यसअघि पनि कीर्तिपुरका दृष्टिविहीन, काठमाडौंका विभिन्न मठ मन्दिरका साधु सन्त, बिरामी, कुरुवा, मजदुर, अपाङ, सरसफाइमा खटिएका कर्मचारी, भारतीय मजदुर, विपन्न परिवारलाई खाद्यान्न सहयोग गरेका थिए । अध्ययनका लागि काठमाडौंमा रहेका सुदूरपश्चिम प्रदेशका विद्यार्थीहरुलाई समेत उनले राहत उपलब्ध गराएका थिए । सुदूरपश्चिमको अछाम जिल्ला निवासी कुँवरले गत चैत १२ गते सुदूरपश्चिममा पहिलो कोरोना भाइरस संक्रमित भेटिएपछि संकलन गरिएको अन्य सम्भावित ७० जनाभन्दा बढीको स्वाब जोखिम मोलेर आफ्नै गाडीमा परिक्षणका लागि काठमाडौं ल्याएका थिए ।
उनले लक्षित वर्गलाई वितरण गर्न केहि संस्थालाई आर्थिक र खाद्य सामाग्री पनि प्रदान गरेका थिए । राहत सामाग्री वितरण गर्दा धेरै भिडभाडन नहोस् भन्ने उद्देश्यले लक्षितवर्ग बस्ने घरमै गएर कुँवरले राहत वितरण गर्दै आएका छन् । उनले गृह जिल्ला अछामको बेयलपाटास्थित न्याय हेल्थ नेपाललाई स्वास्थ्य मन्त्रालयको सहकार्यमा स्वास्थ्य सामाग्री दिने तयारी पनि गरिरहेको जानकारी गराए । उनका अनुसार १० थान ज्वोरो नाप्ने थर्मगन, एक सय थान केएन ९५ मास्क, एक सय थानपीपीई सेट, १० हजार थान सर्जिकल मास्क, १० हजार थान पञ्जा र दुई सय लिटर सेनिटाइजर न्याय हेल्थ नेपाललाई उपलब्ध गराइने छ । यी सामाग्री पनि कुँवरले आफ्नै खर्चमा उपलब्ध गराउन लागेका हुन् । उक्त सामाग्री दिन कुँवर सोमबार काठमाडौंबाट अछाम जाँदै छन् ।
-1731995984.jpg)
