काठमाडौं, माघ २९ । विभागीय टोली नेपाल एपिएफ क्लब र नेपाल पुलिस क्लबबीचको लिग चरणको अन्तिम खेल १५औं सानमिगेल ढोरपाटन महिला डबल लिग भलिबल प्रतियोगिताको फाइनल सरह हुने भएको छ । मंगलबार यि दुई टोलीले दोस्रो लिगमा सफलता हात पारेपछि अन्तिम खेल नै उपाधि सरह हुने भएको हो ।
आज हुने खेलमा जित हात पार्ने टोली १५औं सानमिगेल ढोरपाटन महिला डबल लिग भलिबल प्रतियोगिताको च्याम्पियन बन्ने छ । खेल दिउँसो १ बजेपछि हुनेछ । त्यसअघि त्रिभुवन आर्मी क्लब र होङ्ग्वान्जी न्यु डायमन्ड स्पोर्टस् क्लबबीच बिहान ११ बजे प्रतिस्पर्धा हुनेछ ।
दोस्रो लिगमा चौथो चरणको खेल सकिदा अपराजित रहेको एपिएफले १३ खेलबाट ३८ अंक जोडेर लिगको शीर्षस्थानमा रहेको छ । एपिएफसँग नै पराजित भएको पुलिसको समान खेलबाट ३७ अंक छ ।
नयाँ बसपार्कस्थित ढोरपाटन स्पोर्ट्स क्लबको खेल मैदानमा मंगलबार भएको खेलमा एपिएफले त्रिभुवन आर्मी क्लबलाई ३–० को सोझो सेटमा हरायो । एकपक्षीय खेलमा एपिएफले २५–१९, २५–१९ र २५–२१ को जित निकाल्यो । अर्काे खेलमा पुलिसले डायमन्डमाथि २५–२२, २५–१९ र २५–८ को सहज जित निकाल्दै उपाधि दावेदारितालाई यथावत् राख्न सफल भयो । एपिएफसँग पराजित हुनुअघि आर्मीले बुलबुले रारा भलिबल क्लबमाथि २५–१०, २५–१६ र २५–७ को सहज जित निकालेको थियो । १३ खेलबाट २७ अंक जोडेको आर्मीले तेस्रो तथा समान खेलबाटै २२ अंक जोडेर डायमन्डले चौथो स्थान हासिल गरेको छ ।
चितवन टाइग्रेसले १८ अंक जोडेर पाँचौ तथा १३ अंक जोडेर बुलबुले रारा भलिबल क्लबले छैटौ स्थान हासिल गर्यो । पाँचौ भएको चितवनले ५५ हजार तथा छैटौ भएको बुलबुलले ४५ हजार रुपैयाँ प्राप्त गरेको छ । प्रतियोगिताको विजेताले चार लाख पाँच हजार रुपैयाँ हात पार्नेछन् । दोस्रो हुनेले दुई लाख पाँच हजार तथा तेस्रो हुनेले एक लाख पाँच हजार रुपैयाँ तथा चौथौले ७५ हजार रुपैयाँ हात पार्ने छ । पाँचौदेखि छैटौसम्मले क्रमश ७५ हजार, ३५ हजार रुपैयाँ पाउने छन् ।
गतवर्ष जस्तै यो वर्ष पनि विभिन्न चार विधा (उत्कृष्ट खेलाडी, उदियमान, बर्ष खेलाडी र प्लेयर अफ द सिरिज) बन्ने खेलाडीले यु एम स्कुटर पाउनेछन् । त्यस्तै भाग्यशाली एक दर्शक र ग्रेट एचिभमेन्ट अवार्ड विजेतालाई एक–एक थान मोटरसाइकल प्रदान गरिने आयोजकले जनाएको छ । व्यक्तिगत विधातर्फको विजेताले जनही सात हजार रुपैयाँ हात पार्ने छन् ।
-1731995984.jpg)
