काठमाडौं, पुस २६ । साविक विजेता विभागीय नेपाल एपीएफ क्लब र साविक उपविजेता तथा आयोजक न्यु डायमण्ड स्पोर्ट्स क्लब तेस्रो संस्करणको होङ्ग्वान्जी न्यु डायमण्ड खुला राष्ट्रिय महिला भलिबल प्रतियोगिताको सेमिफाइनलमा प्रवेश गरेका छन् । नयाँ बसपार्कस्थित ढोरपाटन क्लबको खेल मैदानमा शुक्रबार भएको खेलमा समूह ‘बी’ मा न्यु डायमन्डले विभागीय नेपाल पुलिस क्लबलाई तथा समूह ‘ए’ माएपीएफले अर्काे विभागीय टोली त्रिभुवन आर्मी क्लबलाई पराजित गर्दै समूह विजेता बनेको हो ।
पराजित पुलिस र आर्मी समूह उपविजेताको रुपमा अन्तिम चारमा पुग्न सफल भए । यससँगै तेस्रो संस्करणको होङ्ग्वान्जी न्यु डायमण्ड खुला राष्ट्रिय महिला भलिबल प्रतियोगिताको सेमिफाइनल समिकरण पनि पूरा भएको छ । आज एपीएफ र नेपाल पुलिस क्लब तथा न्यु डायमन्ड र आर्मीबीच खेल हुनेछ ।
शुक्रबार निकै नै रोमाञ्चक बनेको समूह ‘ब’ को लिग चरणको अन्तिम खेलमा डायमन्डले पुलिसमाथि ३–२ को संघर्षपुर्ण जित निकाल्यो । डायमन्डले शुरुवाती दुई सेट आफ्नो पक्षमा पारेर जितनजिक पुगे पनि त्यसपछिको दुबै सेट गुमाउदा खेल २–२ सेटको बराबरीमा पुगेको थियो । डायमन्डले पहिलो र दोस्रो सेट २५–१९ र २५–२३ ले जिते पनि त्यसपछिको दुबै सेट १७–२५ र १६–२५ ले गुमाएको थियो । तर, निर्णायक सेटमा उच्च प्रदर्शन गर्दै १५–६ को जित निकाल्दै ३–२ को जित निकाल्यो ।
एपीएफले शुक्रबार दोहोरो जित निकाल्दै समूह ‘ए’ को विजेता बन्यो । पहिलो खेलमा पारामाउन्ट इंग्लिस बोर्डिङ स्कुललाई ३–० को सोझो सेटमा पराजित गरेको एपीएफले दोस्रो खेलमा पनि आर्मीलाई सोझो सेटमा पाखा लगायो । पारामाउन्टलाई २५–१८, २५–५ र २५–९ ले हराएको एपीएफले आर्मीलाई २५–२१,२५–१२ र २५–२१ ले पाखा लगायो । एपीएफ र आर्मीबीचको खेल प्रतिस्पर्धात्मक हुने अनुमान गरिएपनि एपीएफले एकपक्षीय जित निकाल्यो ।
होङ्ग्वान्जी बौद्ध समाज नेपालको मुख्य प्रायोजनमा जारी प्रतियोगिताको विजेताले चार लाख एक हजार एक रुपैयाँ , दोस्रो हुने टोलीले तीन लाख एक हजार एक सय रुपैयाँ प्राप्त गर्नेछ । तेस्रो हुनेले टोलीले एक लाख ५१ हजार एक सय एक रुपैया तथा चौथो हुनेले ५१ हजार एक सय एक रुपैयाँ प्राप्न गर्नेछ । प्रतियोगिताको सर्वोत्कृष्ट खेलाडीले २१ हजार एक सय एक रुपैयाँ प्राप्त गर्ने छन् । व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही सात हजार एक सय एक रुपैयाँ पाउने छन् ।
-1731995984.jpg)
