पोखरा प्रिमियर लिगको उपाधि चितवनलाई

राखेप/एनओसी

Home
राखेप/एनओसी
पोखरा प्रिमियर लिगको उपाधि चितवनलाई

पोखरा प्रिमियर लिगको उपाधि चितवनलाई

खेलकुद मञ्‍च 2076-09-12

पोखरा, पुस १२ । चितवन राइनोजले दोस्रो संस्करणको पोखरा प्रिमियर लिग (पिपिएल)टी–ट्वान्टी क्रिकेटको उपाधि जितेको छ । पोखरामा आज भएको फाइनलमा विराटनगर टाइटन्सलाई ३२ रनले पराजित गर्दै चितवनले उपाधि जितेको हो ।

गएको वर्ष पहिलो पिपिएल फाइनलमा पोखरासँग पराजित भएको चितवनले यसपटक लिग चरणदेखि सबै खेल जित्दै उपाधि जित्न सफल भयो । उपाधिसँगै चितवनले २७ लाख प्राप्त गरेको छ । उपविजेता बनेको विराटनगरले १० लाख रुपैयाँ प्राप्त गर्यो ।

चितवनले दिएको दुई सय तीन रनको फराकिलो लक्ष्य पछ्याएको विराटनगरले निर्धारित २० ओभरमा सात विकेट गुमाएर एक सय ७० रन मात्र बनाउन सक्यो । विराटनगरका मोहमद जैद आलमले ५७ रनको अर्धशतकीय इनिङ्स खेले । ४८ बलमा पाँच चौका र तीन छक्का प्रहार गरे पनि टिमलाई जित दिलाउन भने सकेनन् । यस्तै कप्तान प्रदिप सिंह ऐरीले ३६, पुनित मेहेराले ३२ र नोमान खानले १८ रन बनाए । चितवनका करण केसीले तीन तथा सन्नी पटेलले दुई विकेट लिए । रोहन मुस्तफाले एक विकेट हात पारे ।

यसअघि पोखरा रंगशालामा टस हारेर पहिले ब्याटिङ गरेको चितवनले निर्धारित २० ओभरमा पाँच विकेट गुमाएर दुई सय दुई रन बनाएको थियो । चितवनको फराकिलो स्कोरमा अनिलकुमार शाह र रोहन मुस्तफाले अर्धशतकीय इनिङ्स खेले । दुबै ब्याट्सम्यानले समान ५०/५० रन बनाए । यस्तै कप्तान पारस खड्काले २५, आरिफ शेखले १९, सन्नी पटेलले १६ र करण केसीले २६ रनको योगदान गरे । विराटनगरका पुनित मेहेराले र जैद आलमले समान दुई/दुई विकेट लिए भने किशोर महतोले एक विकेट लिए ।

पीपीएल उपाधिसंगै पारसले नेपालमा हुने तीनवटै फ्रेन्चाइज क्रिकेटको उपाधि जित्न सफल भएका छन् । यसअघि उनको कप्तानीमा रहेको टिमले एभरेष्ट प्रिमियर लिग र धनगढी प्रिमियर लिगको उपाधि उचालेक थियो ।

प्रकाशित मिति: शनिबार, पुस १२, २०७६ १७:१२