ललितपुर, मंसिर २३ । १३औँ दक्षिण एसियाली खेलकुद (साग)अन्तर्गत पौडीमा गौरिका सिंहले चार स्वर्ण जित्दै इतिहास रचेकी छन् । सातदोबाटोस्थित हिटिङ स्वीमिङ पुलमा भएको सय मिटर फ्रिस्टाइलमा गौरिकाले आज चौथो स्वर्ण पदक जितेकी हुन् । गौरिकाले ५८.१३ सेकेण्डमा निर्धारित दूरी पूरा गर्दै स्वर्ण जितेकी हुन् । यस स्पर्धामा भारतकी सिवांगी शर्माले ५८.१५ समयमा पूरा गर्दै रजत र भारतकै एनी जैनले ५९.०४ मा पूरा गरी कांस्य पदक जितिन् ।
यसअघि गौरिकाले आइतबार चार सय मिटर फ्रिस्टाइलमा तेस्रो व्यक्तिगत स्वर्ण पदक जितेकी थिइन् । उनले यसअघि दुई सय मिटर फ्रिस्टाइल र दुई सय मिटर ब्याकस्ट्रोकमा पनि स्वर्ण पदक जितिसकेकी थिइन् । गौरिकाले आइतबार दुई सय मिटर फ्रि–स्टाईमा पाँच प्रतिस्पर्धीलाई उछिन्दै स्वर्ण पदक जित्दा व्यक्तिगत स्वर्ण संख्या तीन पुगको थियो । दुई सय फ्रि–स्टाईलमा गौरिकाले निर्धारित दूरी ४ मिनेट २५.२८ सेकेन्डमा पार गर्दै नेपाललाई स्वर्ण पदक दिलाउन सफल भएकी थिइन । सोही स्पर्धामा भारतकी शिभांगी शर्माले रजत पदक जित्दा श्रीलंकाकी रामुदिन नुलाराले कास्य पदक जितिन् ।
सागमा कुनैपनि नेपाली खेलाडीले चार वटा स्वर्ण जितेको यो पहिलो पटक हो । साग पौडीको विभिन्न आठ स्पर्धामा सहभागी १७ बर्षीया गौरिकाले थप दुई कांस्यसमेत जितेकी छन् । यसअघि फरकफरक सागमा नेपालका तेक्वान्दो खेलाडी दिपक बिष्टले मात्र चार स्वर्ण जितेका थिए ।
गौरिकाले महिला चार सय मिटर रिलेमा नेपाललाई कांस्य पदक दिलाएकी हुन् । सोही स्पर्धामा भारतले स्वर्र्ण पदक जित्दा श्रीलंकाले रजत पदक जित्न सफल भयो । दुई सय मिटर पुरुष व्यक्तिगत मिड्लेमा श्रीलंकाले म्याथ्यु डुकानले स्वर्ण पदक जित्दा भारतका श्रीधर शिबले रजत र भारतकै श्रीहरी नटराजले कास्य पदक हात पारे । सोही स्पर्धाको महिलातर्फको खेलमा नेपालका टिसा शाक्यले नेपाललाई कास्य पदक दिलाइन् । भारतकी रिचा मिश्राले स्वर्ण जितिन भने पाकिस्ताकी बिस्मा खानले रजत पदक जितिन् । यस्तै एक सय मिटर पुरुष फ्रि–स्टाईलमा श्रीलंकाकालागि म्याथ्यु डुकानले सोमबार व्यक्तिगत दोस्रो स्वर्ण पदक दिलाउँदा भारतका श्रीहरी नटराजले रजत तथा श्रीलंकाका दिमु पेइरिसले कास्य पदक जिते ।
पुरुष ५० मिटर बटरफ्लाईमा श्रीलंकाका म्याथ्यु डुकानले सोमबार तेस्रो स्वर्ण पदक हात पार्दा भारतका विक्रम खाडेले रजत र श्रीलंकाकै दिमु पेइरिसले कास्य पदक दिलाए । महिला ५० मिटर बटरफ्लाईमा भारतलाई दिब्या सतिजाले स्वर्ण पदक दिलाइन् । भारतकै निना भेन्काटेसले रजत पदक आफ्नो नाममा लेखाउँदा श्रीलंकाकी सन्दु साभिन्दीले कास्य पदक जितिन् । सोमबारै सम्पन्न पुरुष चार सय मिटर मिड्लेमा भारत पहिलो बन्दा बंगलादेश दोस्रो, पाकिस्तान तेस्रो भए । सोही स्पर्धामा श्रीलकंका भने अयोग्य भयो । फल्स सुरुआत गरेको श्रीलंकाको रजत पदक गुमेको हो ।
यस अघि आइतबार छिनोफानो हुन बाँकी आठ सय मिटर फ्रि–स्टाईल पुरुष रिलेमा भारतले स्वर्ण पदक जितेको छ भने श्रीलंका र बंगलादेशले क्रमश रजत र कास्य पदक जिते ।
यससँगै पौडीका सबै खेल सकिएका छन् । भारतले सर्वाधिक २७ स्वर्ण, १९ रजत र ६ कास्य पदकसहित कूल ५७ पदकका साथ पौडी तालिकाको शीर्ष स्थानमा अटायो । सात स्वर्ण, ११ रजत र १८ कास्यसहित कूल ३६ पदक जितेको श्रीलंका दोस्रो, चार स्वर्ण, चार रजत र चार कास्यसहित कूल १२ पदक जितेको नेपाल तेस्रो, तीन रजत आठ कास्य गरी कूल ११ पदक जितेको बंगलादेश चौथो तथा एक रजत र दुई कास्य गरी कूल तीन पदक जितेको पाकिस्तान पाँचौं भयो । माल्दिभ्स र भुटानले कुनै पदक हात पारेनन् ।
-1731995984.jpg)
