काठमाडौं, कात्तिक ८ । नेपाल बुद्धिचाल संघको आयोजनमा एशियन एमेच्योर चेस च्याम्पियनसिप २०१९ कार्तिक २२ देखि २९ गतेसम्म राजधानीमा हुने भएको छ । नेपाल बुद्धिचाल संघले राजधानीमा पत्रकार सम्मेलनको आयोजना गरि उक्त जानकारी गराएको हो ।
बुढानिलकण्ठस्थित पार्क भिलेजमा आयोजना हुने च्याम्पियनसिपमा एशियाका करिब ३० देशका एक सयभन्दा बढि खेलाडीहरुको सहभागिता रहने अनुमान गरिएको छ । स्विस लिग प्रणाली अनुसार नौ चरणसम्म संचालन हुने च्याम्पियनसिपमा २१ सयभन्दा कम रेटिङ्ग तथा अधिकतम फिडेमास्टरसम्मको उपाधि प्राप्त खेलाडीले मात्र प्रतिस्पर्धामा सहभागिता जनाउन पाउने आयोजकले जनाएका छन् ।
च्याम्पियनसिपमा प्रत्येक देशबाट दुई खेलाडीले प्रतिस्पर्धा गर्न पाउने र त्यसको सुविधा आयोजकले प्रदान गर्ने छ । त्यसदेखि बाहेकका खेलाडीहरुले च्याम्पियनसिपमा प्रतिस्पर्धा गर्न पाउने तर सुविधा आफैले ब्यहोर्नु पर्ने समेत प्रतियोगिता निर्देशक तथा संघका सचिव धरम लामाले पत्रकार सम्मेलनमा जानकारी गराए । च्याम्पियनसिपमा नेपालका तर्फबाट सुजना लोहनी र पुरुषोत्तम चौलागाईले आधिकारिक खेलाडीको रुपमा प्रतिस्पर्धा गर्ने छन् । यस्तै अन्य खेलाडीहरुले पनि च्याम्पियनसिपमा प्रतिस्पर्धा गर्ने आयोजकले जनाएको छ । उनीहरुलाई अहिले सम्मको खेल कौशलताको आधारमा च्याम्पियनसिपमा प्रतिस्पर्धा गराईन लागेको समेत लामाले जानकारी गराए ।
कूल १३ हजार पाँच सय डलर पुरस्कार राशी रहेको प्रतियोगितामा क्लासिक तथा ब्लिज बिधामा खेल संचालन हुने र विजयी पुरुष खेलाडीले क्यान्डिडेट मास्टर र नगद १५ सय डलर प्राप्त गर्ने छन् भने महिलातर्फ विजयी खेलाडीले ओमेन क्यान्डिडेट मास्टर र नगद सात सय डलर प्राप्त गर्ने छन् । यस्तै पुरुषतर्फ दोश्रोले एक हजार, तेश्रोले सात सय ५०, चौथो र पाँचौले पाँच सय, छैटौंले चार सय, सातौले तीन सय ५० र आठौंदेखि १०औं स्थानसम्मका खेलाडीले तीन सय डलर प्राप्त गर्ने छन् । महिलातर्फ दोश्रो हुनेले नगद पाँच सय, तेश्रो, चौथौं र पाँचौ प्रत्येकले नगद तीन सय प्राप्त गर्ने छन् ।
त्यसैगरी, अनरेटेड, यु ८, यु १०, यु १२, यु १४, यु १६, यु १८ र यु २० का पहिलो र दोश्रो हुने खेलाडीहरुले क्रमशः तीन सय र २० सय डलर नगद प्राप्त गर्ने छन् ।मदन भण्डारी स्पोर्टस् एकेडेमी र काठमाण्डौ महानगरपालिकाको सहकार्य रहने च्याम्पियनसिपलाई नेपाली राजनीतिका अगुवा जन नेता मदन भण्डारीको स्मृतीलाई जोडी मदन भण्डारी मेमोरियल एशियन एमेच्योर चेस च्याम्पियनसिप २०१९ नामाकरण गरिएको छ । यस अघि मदन भण्डारी स्पोर्टस् एकेडेमीले मदन भण्डारीका नाममा विभिन्न चेल प्रतियोगिताहरु सफलताका साथ सम्पन्न गरिसकेको छ । कूल दुई करोड ३० लाख ३१ हजारको लागत अनुमान गरिएको प्रतियोगिताकामा नेपालसहित भारत, चीन तथा अफगानिस्तानका अन्तर्राष्ट्रिय आर्विटरहरुले निर्णायकको भूमिका निर्वाह गर्ने छन् ।
-1760234771.jpg)